Ռեժիսոր Մհեր Մկրտչյանի «Կյանք ու կռիվ 2. 25 տարի անց» ֆիլմի պրեմիերայի օրն արդեն հայտնի է: Ինչպես տեղեկացնում է «Շարմ» հոլդինգը, այն տեղի է ունենալու հունվարի 26-ին «Կինոպարկում»:
«Կյանք ու կռիվ»-ի 2-րդ մասը նկարահանվել է 2016 թվականի ընթացքում: Գաղափարն առաջացել է դեռ 1-ին մասը նկարահանելիս. այդ ժամանակ սկսվել է ապրիլյան քառօրյա պատերազմը, ինչը պրոդյուսերներին եւ ռեժիսորին դրդել է մտածել 2-րդ ֆիլմի ստեղծման մասին:
««Կյանք ու կռիվ 2. 25 տարի անց»` կրկին պատմություն է մեր մասին, մեր ձեռքբերումների ու ձախողումների, մեր երջանկության ու դժբախտության, մեր հարազատների ու թշնամիների, մեր սիրո, երազանքների ու մեր պատերազմի մասին…Նախորդ ֆիլմի հերոսների ճակատագրերի միջով այս ֆիլմում տեսնում ենք անցած 25 տարվա մեր ճանապարհը»,- գրված է «Շարմ» հոլդինգի մամուլի հաղորդագրության մեջ:
2-րդ ֆիլմում դերասանական կազմը փոփոխված է: Դերերում հանդես են գալիս Բաբկեն Չոբանյանը, Շանթ Հովհաննիսյանը, Նարինե Գրիգորյանը, Անի Ղազարյանը, Արծրուն Չոբանյանը, Դիանա Մալենկոն, Դմիտրի Մարյանովը, Գագիկ Մադոյանը, Արմեն Մարգարյանը, Վարուժան Մարգարյանը:
Սցենարի հեղինակը եւ բեմադրող ռեժիսորն է Մհեր Մկրտչյանը, կոմպոզիտորները՝ Արմեն Մարտիրոսյանը, Անդրանիկ Բերբերյանը, պրոդյուսերը՝ Կարեն Ղազարյանը, գլխավոր պրոդյուսերը՝ Ռուբեն Ջաղինյանը:
Ֆիլմի 1-ին մասին պրեմիերան տեղի էր ունեցել 2016 թվականի սեպտեմբերի 19-ին:
