Volkswagen ավտոկոնցեռնը Չինաստանում մոտ 50 000 ավտոմեքենա է հետ կանչում արգելակման համակարգում խնդրի պատճառով: Այս մասին ասվում է Չինաստանի Որակի վերահսկողության, ստուգման և կարանտինի հարցերով պետական վարչության (AQSIQ) հաղորդագրության մեջ:
Հաղորդվում է, որ հետ է կանչվում 2012 թ. հուլիսի 1-ից 2015 թ. օգոստոսի 6-ին արտադրված Beetle մոդելի 44718 ավտոմեքենա, նաև 2012 թ. հուլիսի 1-ից 2013 թ. հուլիսի 6-ին արտադրված Golf մոդելի 4762 ավտոմեքենա:
AQSIQ-ի հաղորդագրության համաձայն՝ նշված ավտոմեքնաների կրուիզ-կոնտրոլի երկար օգտագործման պատճառով կարող է խնդիր առաջանալ արգելակների վակուումային ուժեղացուցիչի և դրա օդի զտիչի հետ, ինչն ի վերջո կարող է ազդել արգելակման ոտնակի աշխատանքի վրա և հանգեցնել վթարային իրավիճակի: Հետկանչումը սկսվում է փետրվարի 6-ին: Volkswagen-ը խոստանում է թերությունն անվճար վերացնել:
