«2016-ը «Լուսավոր Հայաստան»- ի համար առաջին քայլերը կատարելու տարի էր, մենք ամբիցիոզ խնդիր էինք դրել մեր առջև. հավաքել այնպիսի մարդկանց թիմ, ովքեր ապաքաղաքականացված ոլորտից են, սակայն ցանկանում են Հայաստանը փոխել, նպաստել ստեղծված վիճակի բարելավմանը: Ամբողջ տարին մենք ՀՀ մարզերում տասնյակ հազարավոր մարդկանց հետ ենք հանդիպել, լսել ենք նրանց խնդիրները:
Փորձել ենք ընտրական գործընթացներում ներկայացնել նոր տիպի մշակույթ, մեզ համար առանցքային է քաղաքական սերնդափոխություն իրականացնելը և հենց այդ ճանապարհով էլ գնում ենք:
Ակտիվորեն նախապատարաստվում ենք առաջիկա խորհրդարանական ընտրություններին: Դաշինք է կազմվել «Քաղաքացիական պայմանագիր» և «Հանրապետություն» կուսակցությունների հետ, հնարավոր է նաև այլ ուժեր միանան:
Մեկ տարին քաղաքականության համար շատ կարճ ժամանակահատված է, բայց ես վստահ եմ, որ մեր արմատները շատ խորն ենք դրել և ունենք շատ ազնիվ մղումներ ու նպատակներ»,- այս մասին, ամփոփելով 2016-ը, «Առաջին լրատվական»- ի հետ զրույցում ասաց «Լուսավոր Հայաստան» կուսակցության խորհրդի անդամ Հայկ Կոնջորյանը:
Նրա խոսքով՝ 2016-ի բոլոր նպատակները չէ, որ իրականացել են: «Կային նպատակներ, որոնք օբյեկտիվ կամ սուբյեկտիվ պատճառներով չիրականացան կամ իրականացան մասամբ: Առաջնային խնդիրը կուսակցաշինությունն էր, «Լուսավոր Հայաստան»- ի գործունեության գլխավոր նպատակը հասարակական բարիք ստեղծելը և դրան ծառայելն է:
ՏԻՄ ընտրությունների առումով, մեր նպատակները, չենք կարող ասել, որ լիովին իրականացան, օրինակ՝ Վանաձորի ավագանիում մինչև հիմա դրամատիկ վիճակ է ստեղծված, ՀՀԿ-ի հերթական խարդախությամբ, մանդատագողությամբ քաղաքապետ ընտրվեց, որը չի կարողանում նույնիսկ ավագանու նիստ գումարել:
Սակայն մենք կարողացանք, այլ քաղաքական ուժերի հետ համագործակցելով, աննախադեպ բան անել. կարողացանք կոտրել ՀՀԿ-ի անհաղթահարելիության բարդույթը,- նշեց Հայկ Կոնջորյանը:
Մանրամասները՝ տեսանյութում: