ՌԴ ԱԳՆ հատուկ հանձնարարությունների հարցերով դեսպան Էլեոնորա Միտրոֆանովան հայտարարարել է, որ «ԽՍՀՄ նախկին երկրներում ռուսերենին երկրորդ պետական լեզվի կարգավիճակ շնորհելու հարցը կներառվի Ռուսաստանի արտաքին քաղաքականության հարցերի օրակարգում, և Ռուսաստանն ամեն ջանք գործադրելու է այդ ուղղությամբ»: Միտրոֆանովայի խոսքով՝ ռուսերենը դառնում է ազգամիջյան շփումներում գերիշխող լեզու:
Թեմայի շուրջ «Առաջին լրատվական»- ի հետ զրույցում «Մխիթար Սեբաստացի» կրթահամալիրի տնօրեն Աշոտ Բլեյանը նշեց. «Պուտինյան Ռուսաստանը սովոր է աշխատել կացնով, ավանդաբար նրանց գործիքը կացինն է՝ հատկապես հիմա: Կացնով են աշխատում Սիրիայում, ամեն տեղ, Հալեպը այդ կացնի արդյունքում ոտքի տակ տրվեց, ռուսական կործանիչների ռմբակոծությունների հետևանքով է նաև հայկական համայնքը ոչնչանում Սիրիայում:
Եթե այդ կացինը՝ պարտադրանքը, ահաբեկումը տեղափոխում են նաև այդ ոլորտ, դա շատ վտանգավոր է: Հայաստանի իշխանությունները երկրորդական չպետք է համարեն այդպիսի հայտարարությունները: ՀՀ արտաքին գործերի նախարարությունը կամ ՀՀ նախագահը, կամ կառավարությունը թող որոշի, թե ով պետք է պատասխանի այդ հայտարարությանը. ազգային արժանապատվությանը, երկրի ինքնիշխանության դեմ ուղղված այդպիսի հայտարարությանը պետք է արժանի պատասխան տրվի՝ պետական մակարդակով»:
Ա. Բլեյայանի դիտարկմամբ՝ ռուսերենն ավելի գրավիչ կդառնա, եթե Ռուսաստանը դարձնեն գրավիչ: «Այսօրվա Ռուսաստանն ինձ չի գրավում, այլ հակառակը՝ վանում է, վտանգավոր է: Եթե ազատ ժողովրդավար երկիր լիներ, որի հետ, օրինակ, կարելի կլիներ համատեղ ֆիլմեր նկարահանել, բիզնես ծավալել և այլն, ինքնըստինքյան ռուսերենը կսկսեր գործածվել»,- նշեց Ա. Բլեյանը, ընդգծելով, որ այնուամենայնիվ ռուսերենը մեզ համար օտար լեզու է:
Հայաստանի միակ պետական լեզուն հայերենն է: ՀՀ-ում 98 տոկոսը հայերն են ապրում և գործածական օտար լեզուն անգլերեննէ, իմաստ չունի, այն էլ հանրակրթության ոլորտում, պարտադրել երկու օտար լեզու:
Մանրամասները՝ տեսանյութում: