BBC News-ի փոխանցմամբ՝ Չինաստանի իշխանությունները հայտնել են կոռուպցիայի համար մեկ միլիոն պաշտոնյա պատժելու մասին։ Տվյալները հրապարակել է Չինաստանի Կոմկուսի Կենտրոնական հանձնաժողովը։
Տեղեկատվությունը հաղորդվել է կուսակցական պլենումի բացման օրը։ Կենտրոնական հանձնաժողովը մանրամասնել է, որ պատժվել են ինչպես ամենափոքր մակարդակի, այնպես էլ՝ ամենաբարձր մակարդակի պաշտոնյաներ, այդ թվում՝ նախարարներ։
Նրանց մեղավոր են ճանաչել կաշառակերության կամ իշխանությունը չարաշահելու համար։ Չինաստանի նախագահ Սի Ցզինպինը 2012 թվականին իշխանության գալուց հետո սկսել է բոլոր մակարդակներով մասշտաբային հակակոռուպցիոն արշավ՝ ընդգծելով, որ «պայքար պետք է մղվի թե՛ ճանճերի, թե՛ վագրերի դեմ»։
