Թուրքական Son dakika լրատվական կայքի փոխանցմամբ՝ այն բանից հետո, երբ Անիի ավերակներն ընդգրկվեցին UNESCO-ի Համաշխարհային մշակութային ժառանգության ցուցակում, այնտեղ այցելողների հեռախոսներին ստացվել է «Բարի գալուստ, Հայաստան» sms: Այս մասին հայտարարել է Էրզրումում գործող Աթաթուրքի համալսարանի գրականագիտության ֆակուլտետի պատմության ամբիոնի ներկայացուցիչ Սավաշ Էղիլմեզը:
Նրա խոսքով՝ երբ ուսուցիչներն ու աշակերտները այցելել են Անիի ավերակներ, բջջային կապի օպերատորներից մեկից թուրքերենով ստացվել է «Բարի գալուստ, Հայաստան» sms-ը, որը «շոկի է ենթարկել» նրանց:
«Ստացվում է, որ այդ օպերատորը պատմական Անի քաղաքը ընդգրկել է Հայաստանի սահմաններում և այդպիսով կատարել հայերի վաղեմի փափագը:
Մենք դիմելու ենք դատախազություն, որպեսզի չեղյալ հայտարարվի այդ օպերատորի լիցենզիան: Մենք օգտագործելու ենք մեր բոլոր օրինական իրավունքները և ցանկանում ենք, որ այս իրավիճակը շտկվի հնարավորինս շուտ»,- ասել է նա: