Կոմիտասի թանգարան-ինստիտուտում մեկնարկեց «Կոմիտասը և միջնադարյան երաժշտական մշակույթը» խորագիրը կրող միջազգային գիտաժողովը: «Այս գիտաժողովը, որն առաջին անգամ է տեղի ունենում Հայաստանում, մի նոր գիտական ավանդույթի հիմքը պետք է դառնա, սրանով մենք սկզբնավորում ենք միջազգային մի գիտաժողովը, որը, հուսով ենք, գնալով կընդլայնվի և կընդգրկի նորանոր մասնակիցների,- «Առաջին լրատվական»- ի հետ զրույցում ասաց արվեստագիտության դոկտոր, արվեստի վաստակավոր գործիչ Աննա Արևշատյանը: – Պատահական չէ, որ գիտաժողովն ունի «Կոմիտասը և միջնադարյան երաժշտական մշակույթը» խորագիրը, որովհետև բացի նրանից, որ Կոմիտասը եղել է հանճարեղ կոմպոզիտոր, խմբավար, երգիչ, նաև խոշոր գիտնական էր, մեր ֆոլկլյորագիտության և երաժշտական միջնադարագիտության հիմնադիրն էր»:
Աննա Արևշատյանի դիտարկմամբ՝ Կոմիտասը ճանաչված է, բայց ճանաչված է ոչ բավարար չափով. «Այս փառատոն-գիտաժողովի նպատակն է Կոմիտասի անունն առավել ճանաչված դարձնել ամբողջ աշխարհում, որովհետև նա իր վաստակով և տաղանդով միանշանակ արժանի է դրան»:
Աննա Արևշատյանը համամիտ չէ այն դիտարկմանը, որ Կոմիտասի նման մեծությունները կարծեք թե անուշադության են մատնված. «Կոմիտասը անընդհատ հնչում է մեր համերգասրահներում և նրա ստեղծագործությունները կատարում են մեր բոլոր խմբերգային կոլեկտիվները: Ես չէի ասի, թե մենք հեռացել ենք անաղարտ ակունքներից»:
Մանրամասները՝ տեսանյութում:
