Ինդոնեզիայի Սումատրա կղզու հյուսիսում բնակավայրերից տարհանվել է գրեթե 10 հազար մարդ՝ Սինաբունգ հրաբխի ակտիվացումից հետո: Այս մասին հայտնում է Detick պորտալը:
Ներկայումս տեղի իշխանություններն ամբողջովին փակել են հրաբխի խառնարանից 7 կմ հեռավորության վրա գտնվող գոտին: Մոխրի առաջին արտանետումն արձանագրվել է օգոստոսի 24-ին, օրվա ընթացում հրաբուխը շարունակել է ակտիվությունը, ծխի սյան և շիկացած մասնիկների բարձրությունը հասել է 3,5 կմ-ի:
Սինաբունգը համարվում է գործող հրաբուխ, ծովի մակարդակից դրա բարձրությունը 2460 մետր է: Մոտավորապես 400 տարվա մեջ առաջին ժայթքումը տեղի է ունեցել 2010թ., որից հետո մոխրի արտանետումները կրկնվում են գրեթե յուրաքանչյուր տարի:
