Երեկ ՊՊԾ գնդում և Խորենացի փողոցում իրավիճակ փոխվեց. հարթակից կրկին հեռացավ Նիկոլ Փաշինյանը, և ձևավորվեց համակարգող խումբ:
Այս առնչությամբ «Իրազեկ քաղաքացիների միավորում» ՀԿ նախագահ Դանիել Իոնիսյանը «Առաջին լրատվական»-ի հետ զրույցում ասաց. «Իմ կարծիքով՝ պատանդների ազատ արձակումը շատ կարևոր քայլ էր, որը ընդգծեց այն արժեհամակարգը, որը կրում են «Սասնա ծռերի» տղաները: Ցուցադրվեցին նաև կադրեր, թե ինչպես էին նրանք ըստ էության ճանապարհում սպանված գնդապետին՝ իրենց մոտ պահվող ոստիկաններին տալով զենք, որպեսզի նրանք կարողանան օդ կրակել: Սա ապացուցեց, որ այս մարդիկ ահաբեկիչ չեն»:
Քաղաքական դաշտում ստեղծված իրավիճակը մեր զրուցակիցը համարում է վատ. «Մի կողմից՝ մենք տեսնում ենք ՀԱԿ-ի դիրքորոշումը, որը, մեղմ ասած, ընդունելի չէ, մյուս կողմից՝ «Քաղաքացիական պայմանագրի» այդտեղից հեռանալը»:
Դանիել Իոնիսյանը համարում է, որ «Քաղաքացիական պայմանագրի» և Ժիրայր Սեֆիլյանի միջև եղած տարակարծությունը դեռ չէր նշանակում, որ իրենք պետք է լքեին հրապարակը. «Գնալով՝ իրենք առաջին հերթին թողնում են այդտեղ կանգնած խաղաղ ցուցարարներին: Ես կարծում եմ՝ իրենց ներկայությունը բավական կարևոր է, քանի որ կարողանում էին ցույցը խաղաղ պահելու բավական կարևոր դերակատարումը ստանձնել»:
Մեր զրուցակիցը անընդունելի է համարում նաև միակ ընդդիմություն լինելու մասին հայտարարությունները և չի կարծում, որ «Քաղաքացիական պայմանագիրը» երեկ երեկոյան տեղի ունեցածից շահեց: