ԱԺ կողմից վերջերս երրորդ ընթերցմամբ ընդունվել էր ժամանակովոր անաշխատունակության նպասների մասին օրենքում փոփոխությունների նախագիծը, որով կարգավորվում է հղիության նպաստի չափը: Ըստ նոր կարգի, մինչև162.5 հազար դրամ աշխատավարձ ստացող բոլոր կանայք «ֆիզարձակուրդ» գնալիս կշարունակել ստանալ ճիշտ այնքան նպաստ, որքան աշխատավարձ որ ստանում էին մինչև արձակուրդ գնալը: Այս մասին այսօր հայտարարեց Աշխատանքի և սոցիալական հարցերի փոխնախարար Արտեմ Ասատրյանը: Ըստ նրա, առաջիկա տարիներին «ֆիզարձակուրդ» գնալու ենթակա կանանց թիվը, որոնք ստանում են մինչև 162.5 հազար դրամ աշխատավարձ, կազմում է ողջ կանանց 95 տոկոսը: Մյուս 5 տոկոսը ստանում են 162.5 հազար դրամից բարձր աշխատավարձ: Նրանք բոլորը ժամանակավոր անաշխատունակության ընթացքում կստանան 162.5 հազար դրամ նպաստ, այսիսնքն` ի տարբերություն մյուսների, այս կանանց ժամանակավոր անաշխատունակության նպաստը չի փոխհատուցի աշխատավարձի 100 տոկոսը: «Գործնականում տարբեր երկրներում կան նման սահմանափակումներ, բայց կա նաև երկրորդ տարբերակը: Այսինքն` սահմանափակվում է հիմք ընդունվող աշխատավարձը: Օրինակ` նպաստի չափը հաշվարկելիս հիմք է ընդունվում աշխատավարձի 50 տոկոսը կամ 60 տոկոսը: Եթե մենք այս մոդելը ընտրեինք, կստացվեր, որ այս սահմանափակումը վերաբերում է բոլոր աշխատավարձ ստացողներին: Բայց հաշվի առնվեց այն, որ այս նպաստները սոցիալական խնդիր են լուծում: Այստեղ որոշակի խնդիրներ էլ կային, երբ ներկայացվում էին շատ բարձր աշխատավարձի վերաբերյալ տեղեկանքներ, որը վերահսկելը շատ դժվար էր վարչարարության առումով, և միլիոնավոր դրամներով նպաստ էր նշանակվում, ինչը անընդունելի էր: Այսինքն` մեր ընտրած տարբերակով կբացառվեն նաև տարբեր տեսակի զեղծարարությունները»,- նշեց Ա. Ասատրյանը:
