Ռուսական RIA Novosti լրատվական գործակալության փոխանցմամբ՝ Թուրքիայում ահաբեկչական հռչակված ու արգելված «Քրդստանի աշխատավորական» կուսակցության (PKK) զինյալները երկրի արևելքում մարտի մեջ են մտել թուրքական բանակի հետ, որի ժամանակ սպանել են 40 զինվորականի, ինչպես նաև ոչնչացրել երկու տանկ: Այս մասին նշված է PKK-ի մարտական թևի՝ HPG-ի տարածած հայտարարության մեջ: HPG-ի տվյալներով՝ մարտը տեղի է ունեցել մայիսի 28-ին, սակայն ավելի վաղ այդ մասին չի հաղորդվել:
Հայտարարության մեջ ընդգծվում է, որ մարտը տեղի է ունեցել Շըրնաք նահանգի Ուլուդերե շրջանում, որտեղ քուրդ զինյալները գրոհել են տեղի զորամասը:
Ավելի վաղ հաղորդվել էր, որ 2015 թվականի հուլիսից վերսկսված բախումներում սպանվել է Թուրքիայի անվտանգության ուժերի ավելի քան 480 ներկայացուցիչ:
Քուրդ զինյալները համացանցում տեսանյութ են հրապարակել Հաքքարի նահանգի Շեմդինլի շրջանում թուրքական զրահապատ ավտոմեքենան պայթեցնելու մասին: