«Արցախյան հերոսամարտում մեր հաղթանակը, ապրիլյան քառօրյա պատերազմում մեր երիտասարդների տարած հաղթանակը ևս մեկ անգամ ապացուցում է, որ նոր սերունդը ցեղակրոն, տարոնական և առաքելական-քրիստոնեական գաղափարախոսության կրողն է», – Գարեգին Նժդեհի արձանի բացման արարողությունից առաջ լրագրողների հետ զրույցում ասաց ԱԺ նախագահի փոխնախագահ, ՀՀԿ խոսնակ էդուարդ Շարմազանովը:
«Այո, այսօրվա սերունդը Գարեգին Նժդեհի արժանի հետևորդներն են, ովքեր իրենց մեջ կրում են նրա գաղափարախոսությունը», – ասաց նա:
Լրագրողի դիտարկմանը, թե շատ է խոսվում այն մասին, որ արձանը նման չէ Գարեգին Նժդեհի իրական կերպարին, Շարմազանովը չհամաձայնեց, ընդգծելով, որ դա պրիմիտիվ դատողություն է, քանի որ այս արձանի մեջ ներառված է Նժդեհի ամբողջական կերպարը:
«Առաջին իսկ օրվանից այցելել ենք արվեստանոց, հանդիպել քանդակագործի հետ պարոն Մարգարյանի հետ՝ պարոն նախագահի գլխավորությամբ այցելել ենք, տեսել ենք նրա աշխատանքը: Այս արձանը ֆանտաստիկ է, քանի որ այն հետագայում լինելու է հայ ժողովրդի ամենասիրելի արձաներից մեկը: Այս արձանի մեջ հեղինակը ցույց է տալիս և’ Նժդեհի ոգին, և’ ուժը, և’ նրա հայացը, և’ հավիտենականությունը», – ասաց Է. Շարմազանովը:
