Հայաստանում ԱՄՆ դեսպան Ռիչարդ Միլսն այսօր մասնակցում էր «Մարիոթ Արմենիա» հյուրանոցում կազմակերպված «ԱՄՆ գործարար ճեպազրույց. Հայաստան» համաժողովին:
Ի պատասխան հարցի՝ մեկ տարի առաջ նշել էիք, որ Հայաստանում կոռուպցիայի մակարդակը թույլ չի տալիս ավելի լուրջ ներդրումներ ներգրավել Հայաստանի տնտեսություն, ինչ-որ բան փոխվե՞լ է այդ առումով, դեսպանը նշեց. «Անցած շաբաթ ՀՀ վարչապետն ասաց, որ կոռուպցիայի խնդիրը կա, և այդ հարցը պետք է ամերիկյան գործարարներն իրենց աչքի առաջ ունենան և իմանան, թե ինչպես պետք է գործ ունենան»:
Ռ. Միլսը նաև հավելեց, որ համաժողովին մասնակցում են փորձառու ամերիկյան ընկերություններ. «Այսօր իմ խոսքում նրանց կասեմ, որ իրենք Հայաստանում ունեն գործընկերներ լրատվական դաշտում, կառավարությունում, գործարարների շրջանում, քաղաքացիական հասարակությունում, որոնց հետ միասին կարող են աշխատել կոռուպցիայի դեմ պայքարում խաղի հավասար պայմաններ ապահովելու ուղղությամբ:
Գործարար ոլորտում կոռուպցիայի դեմ պայքարի լավագույն ճանապարհը, իմ կարծիքով, այն է, որ օրինակներ լինեն, որոնք ի ցույց կդնեն, թե ինչպես կարելի է առանց կոռուպցիայի հաջողությամբ տնտեսվարել, և կարծում եմ՝ ամերիկյան ընկերությունները կարող են այդպիսի լավ օրինակ ծառայել»:
Հայաստանում ԱՄՆ դեսպան Ռիչարդ Միլսի խոսքով՝ «ԱՄՆ գործարար ճեպազրույց. Հայաստան» համաժողովի նպատակն այն է, որ Հայաստան են հրավիրվել ամերիկյան այն մեծ ընկերությունները, որոնք արդեն նախկին Խորհրդային Միության տարածքում տնտեսվարելու և գործունեություն իրականացնելու մեծ փորձ ունեն, և նրանց ներկայացվում են հնարավորություններ, որոնք առկա են Հայաստանում: Դրանք ընկերություններ են սպառողական ապրանքների, ճարտարագիտության, տեղեկատվական տեխնոլոգիաների ոլորտներից:
«Ես միշտ ասել եմ, որ այն ամերիկյան ընկերությունների համար, որոնք այստեղ գալիս են պատրաստված, շրջահայաց կերպով և ցանկանում են գործունեություն իրականացնել, միշտ կան հնարավորություններ:
Հայաստանում վերջին տասնամյակի ընթացքում եղել են բարեփոխումներ, որոնք հնարավորություն են տալիս Հայաստանում ներդրումներ իրականացնել, եղել են հարկային, մաքսային ոլորտի բարեփոխումներ, մտավոր սեփականության իրավունքի պաշտպանության բարեփոխումներ»,- ասաց դեսպանը:
Նրա խոսքով՝ այդ ամենի արդյունքում Հայաստանում կատարվել են ամերիկյան մեծ ներդրումներ, այդ թվում՝ «Կոնտուր Գլոբալ» ընկերության կողմից «Որոտան» հիդրոկասկադի ձեռք բերումը, որը խոշորագույն ամերիկյան ներդրում է Հայաստանում: