ԵԱՏՄ երկրները Բարձրագույն եվրասիական տնտեսական խորհրդի առաջիկա նիստում կարող են որոշում ընդունել Սերբիայի հետ բանակցությունների մեկնարկի մասին` նրա հետ ազատ առևտրի միասնական համաձայնագրի կնքման համար։ Այս մասին հայտնում է Sputnik գործակալությունը։
Ներկա պահին ԵԱՏՄ 5 երկրներից Սերբիայի հետ ազատ առևտրի մասին պայմանագիր են կնքել Ռուսաստանը, Ղազախստանն ու Բելառուսը։ Հայաստանն ու Ղրղըզստանը նման համաձայնագրեր չունեն։
«Դեռևս չենք կարող նախանշել նման համաձայնագրի գործողության մեկնարկի հնարավոր ժամկետը, թե ինչպիսի ապրանքների վրա այն կտարածվի, և երբ կարող են սկսվել մատակարարումները, սակայն հաշվի առնելով այն, որ ազատ առևտրի ռեժիմն արդեն հաստատված է Ռուսաստանի, Բելառուսի, Ղազախստանի և Սերբիայի միջև, հնարավոր է ենթադրել, որ բանակցությունները կարող են ընթանալ դինամիկ ռեժիմով»,- գործակալությանը հայտնել են Եվրասիական տնտեսական հանձնաժողովում։
Սերբիան բազմիցս հետաքրքրվածություն է ցուցաբերել երկրում արտադրվող Fiat ավտոմեքենաներն առանց մաքսատուրքերի ԵԱՏՄ մատակարարելու հարցում։ Ռուսաստանի և Սերբիայի միջև ազատ առևտրի գործող համաձայնագիրը դրանց վրա չի տարածվում։
