Մայիսի 1-ի ուշ երեկոյան, ժամը 11-ի սահմաններում, Մարտունի-Վարդենիս ճանապարհին «Մերսեդես» և «Կիա» մեքենաների բախման հետևանքով տեղում մահացած Արմավիրի մարզի Այգեկ գյուղի մի երիտասարդ ընտանիքի հարազատները շոկային վիճակում են:
Մահացած ընտանիքի հոր՝ տաքսու վարորդ, 32 տարեկան Սուրեն Գրիգորյանի մայրը՝ Հասմիկ Մնացականյանը, որդու ընտանիքի մահվան լուրն իմանալուն պես՝ վատացել է, նրան տարել են Երևան՝ հիվանդանոց:
Այս մասին մեզ հետ զրույցում ասաց Այգեկի գյուղապետ Վարուժան Աբրահամյանը:
Հիշեցնենք, որ ավտովթարի արդյունքում 6 հոգի է մահացել՝ 32 տարեկան Սուրեն Գրիգորյանը, նրա կինը՝ 29 տարեկան Մարգարիտա Ավետիսյանը, և 1 տարեկան դուստրը՝ Նարինե Գրիգորյանը: Սուրեն Գրիգորյանի երկրորդ դուստրը՝ 2 տարեկան Հասմիկ Գրիգորյանը, մարմնական վնասվածքներով հասցվել է Վարդենիսի զինվորական հոսպիտալ, որտեղից շտապօգնության մեքենայով տեղափոխվել է մայրաքաղաք:
Ավտովթարի արդյունքում տեղում մահացել են նաև Վարդենիս քաղաքի բնակիչներ՝ 25 տարեկան Ատոմ Նալբանդյանը, 30 տարեկան Հայկ Մարտիրոսյանը, 32 տարեկան Մհեր Խաչատրյանը:
Այգեկ գյուղի գյուղապետ Վարուժան Աբրահամյանը պատմեց, որ Գրիգորյանների երիտասարդ ընտանիքը գնացել էր խնամու տուն՝ Վարդենիս, և վերադարձի ճանապարհին պատահել է դեպքը: «Մի ամբողջ ընտանիք կործանվեց, թաք տղա էր»,- ասաց գյուղապետը՝ հավելելով, որ լուրը գյուղում շատ ցավագին են ընդունել:
Ավտովթարից փրկված փոքրիկը՝ 2-ամյա Հասմիկը, ռեանիմոբիլով և մասնագետների ուղեկցությամբ տեղափոխվել է «Սուրբ Աստվածամայր» բժշկական կենտրոն: Ըստ բժիշկների՝ երեխայի մոտ առկա է աջ ազդրի կոտրվածք` տեղաշարժով: Ստացել է նաև գլխուղեղի ցնցում: Փոքրիկը բժիշկների ջանքերի շնորհիվ դուրս է եկել շոկային վիճակից և այժմ գտնվում է կենտրոնի մանկական վերակենդանացման ու ինտենսիվ թերապիայի բաժանմունքում: Նրա վիճակը գնահատվում է բավարար:
