Արգենտինայի Սան Կառլոս դե Բարիլոչե քաղաքի իշխանությունները այսուհետև մեկ ծառ կտնկեն այնտեղ ծնված յուրաքանչյուր երեխայի պատվին: Համապատասխան որոշումը միաձայն ընդունվել է քաղխորհրդի կողմից ՝ գրում է tass.ru-ն:
Նախագծի համաձայն՝ նորածնի ծնողները կարող են իրենք ընտրել ծառատեսակը, որը կտնկվի իրենց երեխայի ծննդյան առիթով: Միակ սահմանափակումն այն է, որ ծառատեսակը պետք է պատկանի տեղի բուսական աշխարհին:
Քաղաքապետարանը իր հերթին պարտավորվում է ամեն տարի տնկել այնքան ծառ, որքան երեխա կծնվի քաղաքում: Տեղի առողջապահության նախարարության տվյալներով՝ Սան Կառլոս դե Բարիլոչեում տարեկան ծնվում է միջինը 2500 երեխա:
Նախաձեռնությունը թույլ կտա վերականգնել տեղի անտառները, որոնք խիստ վնասվել են վերջին տարիներին: