Սիրիական զորքերն ազատագրել են Լաթաքիա նահանգի հյուսիսում էլ-Բաշուրա բնակավայրը։ Ինչպես հայտնել է SANA գործակալությունը՝ սիրիական բանակի մարտիկներն այնտեղից դուրս են մղել ահաբեկիչներին, ովքեր փախել են Թուրքիայի սահմանի ուղղությամբ։
«Էլ-Բաշուրան անվտանգ շրջան է հայտարարվել այն բանից հետո, երբ սակրավորները վնասազերծել են այնտեղ զինված միավորումների կողմից թողնված ականները»,- ասել է ռազմական հրամանատարության ներկայացուցիչը՝ փոխանցում է TASS գործակալությունը։
Շաբաթ օրը կառավարական ուժերը կարևոր հաջողության են հասել Ռաբիայի հատվածում։ Նրանք վերադարձրել են վերահսկողությունը Ալիա բնակավայրի և դրանից հյուսիս ընկած ռազմավարական նշանակություն ունեցող բարձունքի նկատմամբ։ SANA-ի տվյալներով՝ ներկայում զորքերը գտնվում են Թուրքիայի հետ սահմանից 8 կմ հեռավորության վրա՝ Լաթաքիայի հյուսիսում։
