Ռուսաստանը կիրառում է հասանելի բոլոր գործիքները ԼՂ հակամարտության կողմերին միջնորդական օժանդակություն ցուցաբերելու համար, ներառյալ բարձր մակարդակի հանդիպումները: Այս մասին ասված է անցնող տարվա արդյունքների վերաբերյալ ՌԴ ԱԳՆ-ի տարածած հաղորդագրության մեջ՝ փոխանցում է TASS գործակալությունը։
«ԼՂ հակամարտության կարգավորման շուրջ պահպանվող բարդ իրադրության լույսի ներքո Ռուսաստանն ակտիվ դեր է խաղացել հակամարտության կողմերին միջնորդական օժանդակություն ցուցաբերելու հարցում՝ կիրառելով հասանելի բոլոր գործիքները, այդ թվում՝ բարձր ու ամենաբարձր մակարդակի հանդիպումները,- տեղեկացրել են Ռուսաստանի դիվանագիտական գերատեսչությունում:- Համապատասխան նախաձեռնությունները հանգամանորեն քննարկվել են Ռուսաստանի նախագահ Վլադիմիր Պուտինի՝ ապրիլին Երևան և հունիսին Բաքու կատարած այցերի ընթացքում, ինչպես նաև քննարկվել են Հայաստանի և Ադրբեջանի արտաքին գործերի նախարարների՝ համապատասխանաբար ապրիլին և մայիսին Մոսկվա կատարած պաշտոնական այցերի ժամանակ»:
«Դեկտեմբերի սկզբին Բելգրադում ԵԱՀԿ ԱԳ նախարարների խորհրդի նիստում ԵԱՀԿ Մինսկի խմբի (Ռուսաստան, ԱՄՆ, Ֆրանսիա) համանախագահ երկրների պատվիրակությունների ղեկավարների հայտարարության մեջ ամրագրված է կողմերին ուղղված հաստատակամ կոչ՝ հաստատել հավատարմությունը հակամարտության խաղաղ լուծմանը և առկա առաջարկությունների հիման վրա շարունակել համապարփակ կարգավորման հասնելուն նպատակամղված աշխատանքը»,- նշել են ՌԴ ԱԳ նախարարությունում: