Երեկ երեկոյան Վարդանանց փողոցում սպանված «Անելիք բանկ»-ի իրավաբանական վարչության 32-ամյա աշխատակից Հովհաննես Աթայանը Սյունիքի մարզի ընդհանուր իրավասության դատարանի նախկին դատավոր Լեռնիկ Աթայանի որդին էր, ծնունդով Գյումրիից։ Հովհաննես Աթայանը, սակայն, ընտանիքով բնակվում էր Երևանում։ Վերջինիս կինը՝ Տաթև Գրիգորյանը, աշխատում է Ֆրանսիական համալսարանում՝ որպես դասախոս։ Ի դեպ, այսօր Ֆրանսիական համալսարանում կատարվածի առիթով դասերը չեղյալ են հայտարարվել։
Նշենք, որ այսօր առավոտյան ոստիկանության քրեական հետախուզության գլխավոր վարչության, Կենտրոնականի բաժնի և ճանապարհային ոստիկանության ծառայողների ձեռնարկած օպերատիվ-հետախուզական և որոնողական անհետաձգելի միջոցառումների շնորհիվ պարզվել է, որ հանցագործությունը կատարել է Երևանի բնակիչ, 1961թ. ծնված Մկրտիչ Պողոսյանը։
Ըստ նախնական տեղեկությունների՝ վիճաբանությունը սկսվել է ճանապարհը միմյանց չզիջելու պատճառով, սակայն չի բացառվում մեկ այլ վարկած, որ նրանք այլ հաշիվներ են ունեցել՝ կապված գումարների հետ։
Ոստիկանության լրատվական ծառայությունից հայտնեցին, որ Մկրտիչ Պողոսյանը դեռ չի հայտնաբերվել, սակայն այդ ուղղությամբ աշխատանքները ակտիվորեն շարունակվում են։
Դեպքի առթիվ քննչական կոմիտեի Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական բաժնում հարուցվել է քրեական գործ` ՀՀ քրեական օրենսգրքի 104-րդ հոդվածի 1-ին մասով:
Նշենք, որ Հովհաննես Աթայանը ամուսնացած էր, ուներ երկու անչափահաս երեխա։
