Հարավային Սուդանում զոհված օդաչուներից Արմեն Անտոնյանի մորը դեռ չեն ասել որդու մահվան մասին։ Այդ մասին «Առաջին լրատվական»-ի հետ զրույցում ասաց նրանց հարևանը՝ Մարտուն Խաչատրյանը։ Վերջինիս խոսքով՝ մայրն առողջական խնդիրներ ունի, վախենում են սիրտը չդիմանա։
Շենգավիթում բնակվող հարևաններն Արմենի մասին միայն դրականն էին խոսում։ «Արմենի պես տղա ես դեռ չեմ հանդիպել։ 3 երեխա ունի, 1 տղա, 2 աղջիկ։ Հոյակապ տղա էր, կյանքում ոչ մեկին վատություն չէր արել։ Աշխատասեր էր, նվիրված»,- ասաց հարևանը։
Ավտոտրանսպորտային էսկադրիլիայի հրամանատար Գագիկ Գալստյանը նույնպես փաստեց, որ բոլոր օդաչուներն էլ հրաշալի մարդիկ էին, լավ պատրաստված, պրոֆեսիոնալ մասնագետներ։
Իսկ թե ինչը կարող էր լինել բեռնատար օդանավի կործանման պատճառ, կպարզեն «սև արկղեր»-ի վերծանումները։