Վերջին 3 ամսում հում շաքարի ֆյուչերսային գործարքների գինն աճել է 16%-ով՝ գերազանցելով 2013 թ. ռեկորդը, վկայում են Bloomberg-ի տվյալները: Նշվում է, որ գնաճը տեղի է ունեցել ապրանքի դեֆիցիտի սպասման ֆոնին:
Շաքարի հարցերով միջազգային կազմակերպությունը (МОС) կանխատեսում է, որ 2015 թ. հոկտեմբերին սկսված սեզոնում 5 տարվա պրոֆիցիտից հետո շաքարի պահանջարկը կգերազանցի արտադրությունը: Կազմակերպության կանխատեսմամբ՝ հաջորդ տարի դեֆիցիտը կկազմի 6,2 մլն տոննա:
Հոկտեմբերի սկզբից շաքարի գինն աճել է 11%-ով՝ ունենալով արժեքի առավելագույն աճ 22 հումքային ապրանքների մեջ, որոնց հետևում է գործակալությունը՝ բացի արծաթից:
Loomis Sayles Alpha Strategies-ի վերլուծաբան Հարիշ Սունդարեշի խոսքով՝ կանխատեսվող դեֆիցիտը կապված է Բրազիլիայում և Հնդկաստանում անբարենպաստ եղանակային պայմանների հետ: Բրազիլիայում հորդ անձրևները խանգարել են այս սեզոնին շաքարեղեգի հավաքման սկզբին, իսկ դրան փոխարինած երաշտը սպառնում է հաջորդ տարվա բերքին, ինչը կարող է խորացնել գլոբալ դեֆիցիտը:
Հնդկաստանի Շաքարի գործարանների ասոցիացիան սեպտեմբերի 28-ին հայտարարել է, որ երկրում արտադրությունը 12 ամսում կնվազի 4,6%-ով՝ մինչև 27 մլն տոննա: Չինաստանում շաքարի արտադրությունը կարող է հասնել 10 տարվա նվազագույն քանակության, երաշտի պատճառով կրճատվել են նաև մատակարարումները Կենտրոնական Ամերիկայից և Հարավային Աֆրիկայից: