Դեռևս մի քանի օր առաջ իրեն պայքարի առաջամարտիկ, հայրենասեր և ազգասեր հռչակած, իսկ այսօր արդեն Ադրբեջանում քաղաքական ապաստան խնդրած «Ներազգային ազատագրական շարժում» ՀԿ ղեկավար Վահան Մարտիրոսյանն ասուլիսով է հանդես եկել, որում վարկաբեկիչ հայտարարություններ է արել Հայաստանի իշխանությունների ու հայկական բանակի մասին, նույն ոգով խոսել սահմանների բացման և փախստականների վերադարձի վերաբերյալ։
Վահան Մարտիրոսյանի նկատմամբ հարուցվել է քրեական գործ՝ ՀՀ քրեական օրենսգրքի 177-րդ հոդվածի 2-րդ մասի 2-րդ կետի հատկանիշներով (խոշոր չափերով գողություն):
Ինչպես տեղեկացրին ՀՀ քննչական կոմիտեից, գործի շրջանակներում որոշում է կայացվել Վահան Մարտիրոսյանին որպես մեղադրյալ ներգրավելու մասին: Սեպտեմբերի 9-ից Վահան Մարտիրոսյանի նկատմամբ հայտարարվել է հետախուզում:
«Առաջին լրատվական»-ի հետ զրույցում թարգմանչուհի, գիտաշխատող Ռուզան Մարգունին մանրամասներ է պատմում իր բնակարանում մեկ շաբաթ ապաստանած Վահան Մարտիրոսյանից և նրա կնոջից, և թե ինչպես է գողացել Վահանը իր՝ տարիների ընթացքում հավաքած գումարը, որը հոր կիսանդրու քանդակի համար էր հավաքել:
«Անհարմար եմ զգում ասել, որ ես այդ մարդուն ճանաչել եմ: Կես տարի առաջ ինձ զանգահարեց ընկերուհիս, որի հետ տարիներ շարունակ աշխատել եմ, ասաց, որ մի տղա կա՝ Վահան Մարտիրոսյան անունով, որը ստորագրահավաք է անում՝ ի պաշտպանություն մի բռնաբարված կնոջ: Ասաց՝ որ գա, ընդունի: Եկավ, ստորագրեցի, գնաց: Հետո Ֆեյսբուքում ընկերության հայտ ներկայացրեց, ես էլ ընդունեցի: Դրանից հետո նա սկսեց գրել, որ իրեն ուզում են վերացնել, որ հետո անհետացել է: Օգոստոսի 20-ին ինձ չաթով գրում է՝ Ռուզան ջան, մենք կնոջս հետ փողոցում ենք մնացել, կարո՞ղ ենք գալ մինչև կիրակի մնալ: Ես էլ համաձայնվեցի»,- պատմեց Ռուզան Մարգունին:
Առավել մանրամասն՝ տեսանյութում: