Վաղը՝ սեպտեմբերի 1-ին, քաղաքացիական ակտիվիստ Վաղինակ Շուշանյանը իր ընկերների հետ կրկին Բաղրամյանում է լինելու: Վերջիններս նախապես հայտարարածի պես կաթվածահար են անելու Բաղրամյան և հարակից փողոցները:
Վաղինակ Շուշանյանն «Առաջին լրատվական»-ի հետ զրույցում ասաց, որ իր ժամանակավոր պասիվությունը պայմանավորված էր առողջական ու սոցիալական խնդիրներով: «Որոշեցի մի փոքր կտրվել, վերականգնվել, ու արդեն ոտքի վրա եմ ու պատրաստ եմ շարունակել մեր պայքարը, անկախ նրանից, որ արդեն որևէ նախաձեռնության անդամ չեմ: Այն պաշարը, որը որ պետք է հավաքեի այս ընթացքում, հավաքել եմ ու պատրաստ եմ պայքարի»,- ասաց Շուշանյանը: Վերջինիս խոսքով՝ պայքարի պահանջները մնալու են նույն 3 պահանջները:
Ակտիվիստի խոսքով՝ Բաղրամյանի օրերին իրենց այլ բան չէր մնում, քան հետևել նախագահի առաջարկած գործընթացին՝ աուդիտին և սուբսիդավորմանը, բայց դա ցույց տվեց, որ «մեր երկրում նախագահի մակարդակով իրենք համար առաջին սուտասանն են»: «Եթե նայում և լսում ես Սարգսյան Սերժի հայտարարությունը, որ մինչև աուդիտի ավարտը վճարման բեռի ամբողջ պատասխանատվությունը կկրի կառավարությունը, առանց որևէ ճյուղային տարանջատման, սակայն մեկ էլ պարզ է դառնում, որ առանձին խմբեր պետք է վճարեն, մյուսները՝ ոչ: Ինչը խայտառակություն է: Իրենք՝ այս իշխանությունները, վաղուց սպառված են, իսկ մեր միակ ճանապարհը, որ մեր ուզածը անեն իրենք, դա փողոցային պայքարն է ու փողոցային ճնշումները, որը վաղվանից կսկսվի»,- ասաց Վաղինակը:
Ի դեպ, ակտիվիստի խոսքով՝ եթե վաղը Բաղրամյանում հավաքվի էական զանգված, ապա չի բացառվում, որ կրկին նստացույց սկսվի:
Վաղինակից հետաքրքրվեցինք, եթե վերսկսվի Բաղրամյանի պիկը, ապա այս անգամ ինչպես կվարվի: «Մեկ նախադասությամբ կպատասխանեմ. կկանգնեմ Բաղրամյանում այնքան ժամանակ, մինչև ինձ կրակեն»: