Թուրքական Son dakika լրատվական կայքի փոխանցմամբ՝ բրիտանական The Economist պարբերականը, վերլուծելով Թուրքիայի ներքաղաքական վերջին զարգացումները, նրա նախագահ Ռեջեփ Էրդողանին որակել է որպես «ղումարբազ»։
Բրիտանական պարբերականը նման կերպ է մեկնաբանել արտահերթ խորհրդարանական ընտրությունների գնալու մասին Էրդողանի որոշումը։ Պարբերականը հիշեցրել է, որ Էրդողանը Թուրքիայի նախագահ է ընտրվել մոտ մեկ տարի առաջ, իսկ նրա կուսակցությունը՝ «Արդարություն և զարգացում» կուսակցությունը (ԱԶԿ), ձախողել է հունիսի 7-ի խորհրդարանական ընտրությունները, որով և կորցրել է միակուսակցական կառավարություն ձևավորելու հնարավորությունը, ինչն ունեցել է ավելի քան 12 տարի։
Պարբերականն ընդգծում է, որ Թուրքիայի պատմության մեջ առաջին անգամ չի հաջողվել ձևավորել կոալիցիոն կառավարություն, ինչն էլ առաջացրել է ժամանակավոր կառավարություն ձևավորելու և կրկնական ընտրություններ անցկացնելու անհրաժեշտություն։
Հրատարակությունը հիշեցնում է, որ չնայած մի քանի օր կար Թուրքիայում կոալիցիոն կառավարության ձևավորման վերջնաժամկետի սպառմանը՝ Էրդողանը նախընտրեց կառավարություն ձևավորելու մանդատ չտալ խորհրդարանական երկրորդ ուժ «Ժողովրդա-հանրապետական» կուսակցության (ԺՀԿ) նախագահ Քեմալ Քըլըչդարօղլուին, ինչը կարելի է որակել որպես «քաղաքացիական հեղաշրջում»։
Պարբերականը «ղումար» է որակել քվեատուփերին վերադարձ կատարելու մասին Էրդողանի այդ որոշումը։ Պարբերականը նշել է, որ Էրդողանն ավելի շուտ նման է սուլթանի, քան դեմոկրատի։
