«Առաջին լրատվական»-ի տեղեկություններով՝ «Վեցերորդ զգայարան» հաղորդաշարի էքստրասենս Անի Մաջնունյանի սպանության համար ձերբակալվածը 20-ամյա Մուշեղ Մխիթարյանն է: Նա հոսանքի թանկացման դեմ Բաղրամյան պողոտայի ակտիվ ցուցարարներից է եղել, բայց ոչ՝ կազմակերպչական խմբից: Բացի դա նա Յանուս թատրոնի տնօրենն է:
Ըստ մեզ հասած տեղեկությունների՝ Մուշեղը և Անին ծանոթներ են եղել և բավական մտերիմ հարաբերություններ են ունեցել: Բացի այդ, Մուշեղը մի քանի անգամ իր ծանոթուհու հետ է հաճախել Անիի բնակարան:
Մեզ հասած տեղեկությունների համաձայն՝ սպանության հիմնական պատճառը եղել է գողությունը: Երիտասարդները Անիի բնակարան են գնացել գողություն կատարելու համար և այդպես էլ վարվել են, սակայն գումարը վերցնելուց հետո որոշել են հետքերը վերացնել, ու բանը հասել է դանակահարության: Նշենք նաև, որ Անիի մարմնի վրա հայտնաբերվել է դանակի 58 հարված:
Հիշեցնենք, որ դեպքի առիթով հարուցվել է քրեական գործ՝ ՀՀ քրեական օրենսգրքի 104 հոդվածի 2-րդ մասի 8-րդ կետով (սպանություն՝ զուգորդված ավազակությամբ):
