Sputnik-Georgia լրատվական գործակալության փոխանցմամբ՝ Ուկրաինայի Անվտանգության ծառայությունը հերքել է, որ Վրաստանի խորհրդարանի նախկին նախագահ, «Դեմոկրատական շարժում» կուսակցության առաջնորդ Նինո Բուրջանաձեին արգելել է մուտք գործել երկիր։ Այս մասին հայտարարել է գերատեսչության մամլո քարտուղար Ելենա Գիտլյանսկայան։
Ավելի վաղ ուկրաինական մամուլը, վկայակոչելով իր աղբյուրները, հայտնել էր, որ Ուկրաինայի ԱԳՆ-ը դիմել է Ուկրաինայի Անվտանգության ծառայությանը՝ Նինո Բուրջանաձեին երկրում պերսոնա նոն գրատա հայտարարելու և նրա մուտքն արգելելու համար։
Դրա պատճառը Ղրիմի վերաբերյալ Բուրջանաձեի արած հրապարակավ հայտարարություններն էին։ Ոչ վաղ անցյալում Բուրջանաձեն երկօրյա այցով մեկնել էր Մոսկվա և հանդիպումներ ունեցել Ռուսաստանի ղեկավարության ներկայացուցիչների հետ, ինչից հետո հայտարարել էր, որ Ռուսաստանի իշխանությունների ներկայացուցիչները պատրաստ են ժամանել Վրաստան, հանդիպել իրենց վրացի գործընկերների հետ և քննարկել երկկողմ հարաբերությունների կարևոր թեմաները։
Ղրիմի հետ կապված՝ Բուրջանաձեն հայտարարել էր, որ Ղրիմն արդեն Ռուսաստանի մասն է և այլևս երբեք չի դառնա Ուկրաինայի մաս։ Բուրջանաձեն նաև հայտարարել էր, որ այսօր այլևս որևէ մեկը չի հիշում Ղրիմի մասին, և Ուկրաինայի իշխանություններին մեղադրել էր Արևմուտքի աջակցության ներքո սխալներ գործելու համար։
