Վերջին շրջանում սպառողները դժգոհում են, որ խոշոր առևտրի կենտրոններում կանգնում են փաստի առջև: Ապրանքների գնապիտակների գին են նշում, մեկ այլ գին դրամարկղերում հաշվարկում: Պրիմիտիվ խաբեություն կատարվում է հատկապես «Երևան Սիթի» սուպերմարկետներում:
«Առաջին լրատվական»-ի հետ զրույցում սպառող Արմինե Գրիգորյանը նշեց, որ կանգնել է փաստի առջև: «Հաշվարկով առտևուր էի արել, գները նշված էին, մրգերը, բանջարեղենը իբր զեղչված էին, վերջում դրամարկղում տեսա, որ գումարս չի բավականացնում: Նայեցի կտորնին. վարունգը, նարինջը այլ գին էր նշված: Դրամարկղում ասացի, պնդեցին, որ չեն հասցրել նոր գնապիտակ կպցնել, ստիպված ապրանքի մի մասը չվերցրի»,- մանրամասնեց նա՝ հավելելով, որ իր հետ նման բան մի քանի անգամ է եղել, բայց մտածել է, թե ուշադիր չի եղել: «Հետո ծանոթներս էլ սկսեցին բողոքել, տեսա դրամարկղում բողոքող այլ քաղաքացիների, ինչից էլ պարզ է, որ ուղղակի խաբում են»,- նշեց նա:
«Առաջին լրատվական»-ի հետ զրույցում Սպառողների ազգային ակադեմիայի նախագահ Մելիտա Հակոբյանը նշեց, որ խոշոր առևտրի կենտրոնները նման խաբեությունների դիմում են, նորություն չէ. «Բա այդպես են հարստանում: Դա դա առաջին հերթին պետք է թույլ չտա քաղաքացին, հետո էլ պետական պատկան մարմինները՝ հարկայինը, ՏՄՊՊՀ -ն, Էկոնոմիկայի նախարարության Սպառողների իրավունքների պաշտպանության պետական կոմիտեն, եթե նման վարքագիծ տեսնեն, պետք է անմիջապես պատժեն»:
Մելիտա Հակոբյանը նկատեց, որ այս կառույցները պետք է հետևեն գործընթացներին, բայց պասիվություն են դրսևորում: «Եթե «դուխ» ունեն, Սամվել Ալեքսանյանի սուպերմարկետներում ստուգումներ կանեն, շեֆերին կասեն՝ էս ի՞նչ ենք անում: Բայց սպառողը կարող է ավելին անել. հրաժարվել ապրանքներից, բոյկոտել և այլևս այդտեղ չգնալ: Պատկերացրեք՝ օրը 10 մարդ հրաժարվի, բա էլ այդպես կանե՞ն, առանց այն էլ շատ սպառող չի մնացել»,-մանրամասնեց նա: