«Առաջին լրատվական»-ի զրուցակիցն է «Ոչ թալանին» նախաձեռնող խմբի անդամ Սոֆյա Հովսեփյանը:
-Սոֆյա՛, Ձեր գրառումներից պարզ է դառնում, որ այսօր այն, ինչ տեղի է ունենում Բաղրամյան պողոտայում, ձեզ չի գոհացնում: Իրականում ի՞նչ տեղի ունեցավ և շարժում այսօր, ըստ Ձեզ, կա՞ թե ոչ:
-Մեր շարժումն ի սկզբանե ինչպես եղել է, այդպես շարունակում է մնալ: Նախորդիվ արդեն ասել ենք, որ այս փուլը՝ Բաղրամյան պողոտայում բազմությանը հավաքել և պետությանը ստիպել հաշվի նստել, արդեն արել ենք:
«Ոչ թալանին» նախաձեռնությունն արդեն անցել է գործողությունների այլ փուլ: Մասնագետների հետ հանդիպումներ ենք կազմակերպել, դիմել ենք մի քանի կառույցների, այդ թվում՝ վարչապետին՝ ստանալու մի շարք հարցերի պատասխաններ: Օրինակ՝ մարդիկ այդպես էլ չհասկացան, եթե այդ գումարը բյուջեից չի տրվում, որտեղի՞ց է տրվում, կոնկրետ աուդիտի գումարը որտեղի՞ց է տրվում և այլն: Նաև պահանջ ենք ուղղել Երվանդ Զախարյանին, որ թույլ տա էլէներգիայի ամենօրյա ծախսերը ուսումնասիրել: Այսինքն՝ այն ամբողջ գործողություններն իրականացնել, որոնք հնարավորություն կտան բացահայտելու՝ որտեղ է կատարվում թալանը: Եվ եթե կատարվում է, այն մարդիկ, ովքեր ընտրված են պաշտպանելու ժողովրդին, ովքեր ականատես են լինում թալանին, ինչո՞ւ են անտեսում ժողովրդի պահանջը, արդյո՞ք դա իրենց ձեռք է տալիս:
–Այսինքն՝ շարունակում եք պայքարը՝ հրաժարվելով փողոցային պայքարի՞ց:
-Մենք՝ որպես «Ոչ թալանին» նախաձեռնություն, այնտեղ լինում ենք ֆիզիկապես, բայց գործունեության և գործառույթների առումով մինչ օրս պարզ չէ՝ այնտեղ ինչ է կատարվում: Ես երկու օր շարունակ մասնակցել եմ այդ հանրային քննարկումներին, այն իրավիճակն է, կարծես տարեց կանայք հիշում են իրենց մանկությունը, նորից հետ են գնում՝ ի՞նչ եղավ, ինչպե՞ս և ինչո՞ւ եղավ: Իսկ ինչը, ինչուն և ինչպեսը անցել ենք, իսկ ի՞նչ անենք, որ չլինի: Մենք այստեղ ենք հասել, և մենք գործում ենք այս դաշտում: Այս դեպքում մենք հապաղելու լուրջ խնդիր ունենք: Եթե մենք շարունակենք ուղղակի նստել և միայն նստելով տեսնենք հարցի լուծումը, այս պահին ոչինչ անել չենք կարող: Մենք մասնագետներ չենք, մենք մասնագետներին պետք է վստահենք, նրանք ասում են, որ նախագահը լիազորված չէ սա չեղարկելու, ապա ինչ ճանապարհով ենք հասնելու չեղարկման: Միևնույն է, մեր նպատակը չեղարկելն է, բայց ինչպե՞ս… Այդ ինչպես-ն ենք մենք փնտրում:
-Ակնհայտ է, որ «Ոչ թալանին» նախաձեռնող խմբի անդամները քաղաքացիների համակարգող խմբերում իրենց չեն տեսնում: Ինչո՞ւ:
-Ես չէի ասի քաղաքացիների համակարգող խմբեր, կա մեկ համակարգող խումբ, որի հիմնական անձնակազմը կուսակցություններից է ընտրված՝ թաքնված անառակաբանությամբ: Իրենց թվում է, որ ոչ ոք չգիտի՝ իրենք կուսակցություններից են, իսկ այնտեղ, որտեղ կուսակցություն է ներգրավված, կա կուսակցական շահ, այնտեղ «Ոչ թալանին» նախաձեռնությունն անելիք չունի: Մենք ինքներս ենք հրաժարվել համակարգումից: Ոչ թե մեզ չեն առաջարկում, ժողովուրդն է մեզ առաջարկել վերադառնալ Բաղրամյան, լինել ժողովրդի կողքին, սակայն այնտեղ կան քաղաքական հայացքներ, քաղաքական մտքեր և ինչու չէ, միտում կա հետագայում նպատակը փոխելու, մեր նպատակը նույնն է մնում՝ Ոչ թալանին:
– Նկատի ունեք «Ազատ դեմոկրատներ» և «Ժառանգություն» կուսակցությունների ներկայացուցիչների՞ն:
–«Ժառանգություն», «Ազատ դեմոկրատներ», ոչ միայն նրանք, այնտեղ մեկ-երկուսին լսել եմ, որ տարբեր կուսակցություններից են, բայց չեմ մանրամասնել, թե որ: «Ժառանգությունը»,«Ազատ դեմոկրատները» վաղուց պետք է բարձրաձայնած լինեին այս խնդիրը՝ որպես որոշակի մանդատներ և հնարավորություններ ունեցող ուժեր: Այսինքն՝ սա չպետք է գար-հասներ հասարակական շարժման, նրանք պետք է տեղում ամեն բան անեին: Իսկ հիմա եկել են ժողովրդի դաշտ, այստեղ ամեն բան ժողովուրդն է անելու, ոչ թե իրենք: Իրենք մաքսիմումը կարող են սատարել: Բայց երբ քաղաքականացրին, այնտեղ տեղի է ունենում շահերի բախում:
-Սոֆյա՛, երեկվա միջադեպը մեծ արձագանք գտավ ռուսական լրատվամիջոցներում: Պարույր Հայրիկյանի մուտքը Բաղրամյան պողոտա՝ ԵՄ դրոշով, հարուցեց ցուցարարների զայրույթը: Նրանք պատռեցին դրոշը, վիրավորեցին: Այս վարքը արդյո՞ք չի հեղինակազրկում շարժումը:
-Միանշանակ ես դեմ եմ նման վարք դրսևորելուն, քանի որ սա ՀՀ յուրաքանչյուր քաղաքացու խնդիրն է: Այլ բան է, որ Պարույր Հայրիկյանն առաջին շարժման ժամանակ է եկել եվրոպական դրոշներով, և մենք շատ կոռեկտ մոտեցել ենք, բացատրել, որ այստեղ պետք է ծածանվի միմիայն ՀՀ դրոշը, որ սա միմիայն ՀՀ խնդիրն է: Իսկ եթե դուք ՀՀ խնդիրների լուծումները տեսնում եք այլ երկրների մեջ, ուրեմն այն պարզեք այլ տեղում, քանի որ այն խնդիրը, որ կա, մեր խնդիրն է, և մենք պետք է լուծենք: Եվ իհարկե որևէ բախում չառաջացավ: Իսկ երեկվա ցուցաբերած պահվածքը իրավունք չունեմ գնահատելու, ժողովրդի կողմից գռեհկությունը, միևնույն ժամանակ Հայրիկյանը, շատ լավ իմանալով շարժման ակունքները, չպետք է թույլ տար այս քայլը: Սա ինչ-որ տեղ սադրանք է, քանի որ գիտեր՝ ժողովուրդը չի ընդունում այդ քայլը, և դա իրեն ի սկզբանե ասվել էր, որ միմիայն ՀՀ եռագույնը ծածանվելու է Ազատության հրապարակում և Բաղրամյան պողոտայում և ընդհանրապես «Ոչ թալանին» նախաձեռնության կազմակերպած ցույցերին:
–Ըստ Ձեզ՝ ի՞նչն է պատճառը, որ իշխանությունները հաշտվել են Բաղրամյան պողոտան փակ լինելու հետ, որ այլևս ուժ չեն կիրառում ոստիկանները: Սա արդյոք շարժումը փակուղի չի՞ տանում՝ հաշվի առնելով, որ երկար ժամանակ չի կարող ձգվել պայքարը:
-Հաշվի առնելով, որ մարդիկ այդտեղ երկար ժամանակ չեն կարող նստել, հաշվի առնելով մարդկանց զբաղվածությունը, բավականին լուրջ նյութական վնասներ են կրել, քանի որ իրենց աշխատանքն է տուժել, քանի որ մեր նախաձեռնության մասնակիցները՝ բոլորս էլ օրվա աշխատավարձով ապրող մարդիկ ենք: Բացի այդ, շատ զարմանալի է՝ ինչու ուժ գործադրվեց առաջին օրը, իսկ հետագայում՝ ոչ: Այստեղ կա՛մ իշխանության պատվերն էր, որը կատարեցին որոշ կառույցներ՝ ի դեմս կուսակցությունների, որպեսզի կարողանան «Ոչ թալանին» նախաձեռնության մաքուր գործունեությունը, որը մարդկանց հոսք էր ապահովում Բաղրամյան պողոտայում, ուղղակիորեն թուլացնել, կա՛մ փորձում են այս ճանապարհով հասնել նրան, որ ժողովուրդը կամաց-կամաց գնա, մնան միայն համակարգողները, որոնք այդ դեպքում այլևս անելիք չեն ունենա: Ինչ պետք է համակարգեն, եթե ժողովուրդ չլինի: Այս ամենը ես կարող եմ միայն ենթադրել, հստակ չեմ կարող ասել: Իրականում թե ինչ կա այնտեղ, որտեղ կա քաղաքականություն, չեմ ուզում մտնել, որ չհասկանամ:
–«Ոչ թալանին» նախաձեռնությունը ո՞ր դեպքում նորից դուրս կգա փողոց, ձեր նամակներին և պահանջներին պատասխան չստանալու դեպքո՞ւմ:
–«Ոչ թալանին» նախաձեռնությունը դուրս կգա փողոց այն ժամանակ, երբ, այո՛, ժողովրդի իրական թալանված գումարները փաստաթղթային տեսքով մեր ձեռքին լինեն, և երբ պահանջ ներկայացվի կառավարությանը՝ խնդիրը լուծելու, և երբ չլուծի, չպատժի: Մենք մարզային քննարկումներ ենք կազմակերպում, վաղը լինելու ենք Գյումրի քաղաքում, առաջիկայում կլինենք Վանաձորում, Կապանում և այլն: Խնդիրը հետևյալն է. մարզերում պատկերն այլ է: Այսինքն՝ սա միայն ՀԷՑ-ի թալանը չէ, սա բոլոր շերտերի թալանն է, որը տեղի կառավարումն է ապահովում, և, չգիտեք ինչու, այս ամենին անտարբեր են իշխանությունները: Այսինքն՝ երբ մենք հասնենք նրան, որ պահանջը դրվի, որ յուրաքանչյուր անդամ ինքը պարտավոր է պարտքը վճարել, որովհետև ինքն է թալանել, որ մենք ունենք այդքան պարտք, ինքը թալանել, և պետությունն այդքան անտարբեր է գտնվել, այդ ժամանակ եթե խաղաղ ճանապարհով չիրականացնի, միանշանակ «Ոչ թալանին» նախաձեռնությունը նորից առաջարկելու է ժողովրդին դուրս գալ, ինչպես դուրս եկան մեկ մարդու նման, և պայքարն այս անգամ ավելի անհնազանդ ճանապարհներով տանել, որովհետև մենք հասկացանք մի բան, որ մինչև դու քո ուժը ցույց չես տալիս, քո ուժի հետ հաշվի չեն նստում: