Ռուսաստանի և Ադրբեջանի արտգործնախարարներ Սերգեյ Լավրովն ու Էլմար Մամեդյարովն այսօր Մոսկվայում կքննարկեն ԼՂ հակամարտությանն առնչվող հարցեր:
«Ռուսաստանը որպես ԵԱՀԿ Մինսկի խմբի համանախագահ երկիր, ավելի քան երկու տասնամյակ շարունակում է ակտիվ դեր խաղալ կարգավորման գործընթացում: Հաշվի առնելով աշխարհագրական դիրքը և մեր ժողովուրդների ընդհանուր պատմությունը՝ այս հակամարտության կարգավորումը մեզ համար ունի առաջնային նշանակություն և դասվում է Ռուսաստանի արտաքին քաղաքական առաջնահերթությունների շարքին»,- ասված է ՌԴ ԱԳՆ տարածած մամլո հաղորդագրությունում:
Նշվում է, որ ԵԱՀԿ Մինսկի խումբը կարող է աջակցել, սակայն արդյունքը կախված է ոչ թե միջնորդներից, այլ կողմերից: «Ո՛չ կողմերը, ո՛չ էլ միջնորդները չպետք է ակնկալեն, թե որևէ տեղից ԼՂ ակնթարթային կարգավորման «կախարդական դեղատոմսեր» կհայտնվեն»,- ասված է հաղորդագրությունում:
