Ռիգայի գագաթնաժողովում մենք ստացանք առավելագույնը՝ այն, ինչ հնարավոր էր ստանալ տվյալ իրավիճակում։ Այս մասին լրագրողներին հայտնել է Վրաստանի վարչապետ Իրակլի Ղարիբաշվիլին՝ փոխանցում է apsny.ge-ն:
Նրա խոսքով՝ այժմ մնում է ավարտել տեխնիկական ընթացակարգը և սպասել այն բանին, թե երբ Վրաստանի քաղաքացիները կկարողանան առանց վիզայի մեկնել Եվրամիություն:
Նրա խոսքով՝ «սպասելիքները գուցե ավելի մեծ էին, սակայն մենք պետք է իրատես լինենք։ Մեր կառավարությունն արեց առավելագույնը։ Այդ գործընթացը պետք էր սկսել 2010թ.-ից: Հենց այդ պատճառով էլ Մոլդովան ստացավ առանց վիզայի ռեժիմ: Իսկ մենք այդ ուղղությամբ սկսել ենք աշխատել միայն 2 տարի առաջ»:
Ինչպես նա պարզաբանեց՝ գագաթնաժողովում բոլորը նշել են, որ Վրաստանը շատ մեծ քայլ է կատարել այցագրային ազատականացման ուղղությամբ, որն արտահայտվում է Վրաստանում կատարված բարեփոխումներով և ժողովրդավարական ինստիտուտների ուժեղացմամբ։
«Գլխավորն այն է, որ քաղաքական որոշումն արդեն ընդունվել է»,- ասել է Վրաստանի վարչապետը: