Սան Ֆրանցիսկոյի շուրջ 1000 հայեր երթով անցել են «Ոսկե դարպասներ» կամրջով՝ նշելու Հայոց ցեղասպանության 100-րդ տարելիցը։ Այս մասին հայտնում է San Francisco Examiner-ը։
Երթն առաջնորդել են տեղի հայկական կրոնական և համայնքային ղեկավարները։ «Այսօր երթով գնում ենք ոչ միայն Հայոց ցեղասպանության զոհերի համար, այլև բոլոր ցեղասպանությունների զոհերի։ Միայն այդ ցեղասպանությունների ճանաչմամբ ու ընդունմամբ կարող են մարդկության վերքերը սկսել ապաքինվել»,- ասել է ամերիկահայ համայնքի ակտիվիստ Ալեքս Բաստյանը։
Նշենք, որ Ծոցի շրջանը տուն է մոտ 30 հազար ամերիկահայերի համար։
«Վարդանանց Ասպետների» ավագ հրամանատար Սթիվեն Կրաջյանի խոսքով՝ աշխարհը դաս չի քաղել, այդ իսկ պատճառով անհրաժեշտ է շեշտել 20-րդ դարի առաջին Ցեղասպանության եղելությունը, որպեսզի ողբերգությունները չկրկնվեն։
Երթի անցկացման վայրը պատահական չի ընտրված։ Կրաջյանի խոսքով՝ նման հանրաճանաչ վայրի մոտ երթի անցկացումը ուղերձ է առ այն, որ Ցեղապանությունը պետք է ճանաչվի։