«Մենք գիտենք այն, ինչ դուք գիտեք, ոչ ավելին, մենք միայն հեռուստացույցով ենք լսում այն, ինչ դուք»,- «Առաջին լրատվական»-ի հետ զրույցում ասաց հունվարի 12-ին Գյումիրում սպանված Ավետիսյանների հարազատներից Հրանտ Մխիթարյանը: Նրա կինը Հասմիկ Ավետիսյանի քույրն է, որը ևս պետք է իրավահաջորդ ճանաչվի: Նա նշեց, որ այս պահին, իրենց կարծիքով, գործը անուշադրության է մատնված, իրենց ցավով մտահոգվողներ չկան. «Չգիտենք՝ ինչո՞վ են զբաղված առ այսօր: Արդեն մեկ ամիս է անցել, մենք ոչ մի լուր չունենք, փաստաբանի հետ հանդիպել ենք, բայց էլի ասեմ՝ ձեզանից ավելի բան չգիտենք»:
Նա նկատեց, որ փորձաքննության արդյունքներից ևս տեղյակ չեն, ինչն արդեն զայրացնող է:
Հրանտ Մխիթարյանը նաև ասաց, որ չնայած խոստացել էին Ավետիսյանների հարազատներին հոգեբանական աջակցություն ցուցաբերել, մինչ այժմ այդ ուղղությամբ ևս ոչինչ չի արվել. «Մենք պահանջում ենք այն, ինչ ամբողջ Գյումրին է պահանջում. եթե իշխանությունները անուշադրության մատնեն, մենք մեր ձայնը կբարձացնենք»,-ասաց նա:
Հիշեցնենք, որ Ավետիսյանների հարազատները չեն բացառել, որ կարող են ակցիաներ անցկացնել, ռուսական ռազմաբազա գնալ և մեր իշխանությունների փոխարեն պահանջներ ներկայացնել ՌԴ-ին:
