Հիմնադիր խորհրդարանի ավտոերթի մասնակիցների դեմ հարձակումն իսկապես սարսափելի էր, և այս դեպքի գնահատականները որոշ ժամանակ հետո ավելի ճշգրիտ կտրվեն: Այս մասին մեզ հետ զրույցում նշեց «Իրավունք և աջակցություն» հիմնադրամի հիմնադիր անդամ Սյուզան Սիմոնյանը:
«Երբ մենք հասանք այդ վայրին, բավական թվով քաղաքացիական հագուստով մարդիկ էին հավաքվել և փակել ճանապարհը: Մեր գլխավերևի բարձունքում կային դիմակավորված ավտոմատավորներ ու դիպուկահարներ: Մենք շարվել էինք իրար բավական մոտ, և եթե զոհեր չեղան, միայն Ժիրայր Սեֆիլյանի` որպես հրամանատարի, խելամիտ տակտիկայի շնորհիվ: Որովհետև նախօրոք արդեն, մինչև այդտեղ հասնելը, նա մեզ հրահանգել էր, որ մենք մեքենաներից չպետք է դուրս գանք, եթե հանդիպենք խոչընդոտի:
Մենք շարված էինք, երբ Ժիրայր Սեֆիլյանը իր մի քանի ընկերների հետ դուրս եկավ և մոտեցավ հավաքված խմբին: Այնտեղ եկավ ոստիկանությունն ու սպեցնազը: Հայտնվեցին այնպես, կարծես դեսանտ էին իջեցրել: Երբ Ժիրայր Սեֆիլյանը խոսելուց հետո հասկացավ, որ չպետք է շարունակենք, որովհետև ճանապարհը փակ է, և որևէ կերպ համաձայնության չեկան, շրջվեց և ողջ շարասյան երկայնքով Սեֆիլյանն անցնում էր մեքենաների կողքով ու հրահանգում շրջադարձ կատարել, քանի որ վերադառնում ենք:
Ամեն ինչ կարծես խաղաղ էր մինչ այն պահը, երբ Սեֆիլյանն անցավ մեր մեքենայի կողքով, իսկ մենք 5-րդ մեքենան էինք, ամեն բան հանգիստ էր: Մեր դիմացի մեքենաներն արդեն շրջադարձ էին կատարում, ու մեր մեքենան էր ուզում շրջադարձ կատարել, հրոսակախումբը հասավ մեզ: Մեր մեքենայում, որը վարում էր Ռուզան Եղնուկյանը, հետևում մանկահասակ երեխաներ էին ու երիտասարդ աղջիկներ:
Մենք հայտնվեցինք թակարդում, շրջապատեցին մեզ: Առաջինը, որ տեսա, այն էր, որ պոկեցին առջևի մեքենաների դրոշները: Նրանք պոկեցին մեր մեքենայի դրոշը, բացեցին դուռն ու դրոշի ձողով սկսեցին հարվածել»:
Մանրամասները` տեսանյութում:
