«Մեր որդին կարգապահ զինվոր, կուրսանտ է եղել, սա պատվի հարց է, փորձել են կոտրել, չեն կարողացել, սպանել են դաժանորեն »,- «Առաջին լրատվականի» հետ զրույցում նշեցին Երևանի Վազգեն Սարգսյանի անվան ռազմական ինստիտուտի սպանված ուսանող, 19-ամյա Հայկազ Բարսեղյանի ծնողներն ու հարազատները:
Հայրը՝ Արկադի Բարսեղյանը պատմեց, որ քնած որդուն առանձնակի դաժանությամբ են սպանել, սկզբում 4 հոգով ծեծել են, կտրող ծակող գործիքը մտցրել աջ արմունկի հատվածում, սակայն Հայկազը դեռ ողջ է եղել, որոշել են կախել, ընդ որում՝ չորսի «բուշլատի» միջի թելերով:
«Որդիս 15 տարեկանում ընդունվել է Մոնթե Մելքոնյանի անվան ռազմական վարժարան. 400 հոգուց 200-ն էին անցել, վերջնական արդյունքում՝ իննսունը։ Որդիս գերազանցիկ էր սովորում։ Մինչ ինստիտուտում սովորելը մի քանի ամիս Հադրութում է ծառայել՝ որպես հրաձիգ, շատ գոհ են եղել իրենց, խնդրահարույց հարցեր չի ունեցել»,- մանրամասնեց հայրը:
Մայրը՝ Արմինե Միքայելյանը պատմեց, որ որդուն վերջին անգամ հունվարի 7-ին է տեսել. «Դեռ մանկուց երազում էր զինվոր դառնալ, ասում էր՝ մամ ջան, դու ասա՝ մեկ –երկու, ես քայլեմ, միշտ ասում էր՝ ամեն ինչ լավ «տոշնի ա», մամ ջան»։
Մայրը նաև պատմեց, որ Մոնթե Մելքոնյանի անվան վարժարանը ավարտելիս հարցաթերթիկ է լրացրել, որտեղ բոլոր հարցերին Հայկազը պատասխանել է, անպատասխան է մնացել միայն այն հարցը, թե 20 տարի անց իրեն ինչպես է պատկերացնում։
Նշենք նաև , որ հարազատները պատմում էին , որ այս ամենը ծագել է կենցաղային խնդրից , երբ որդին զգաշացում է արել ոճրագործությունը կատարած 4-ից մեկին, որ սպասքից նորմալ օգտվեն: Նրանք պնդում էին, որ այդ չորսից մեկը գնդապետի որդի է: