Հայաստանի Հանրապետության արտաքին գործերի նախարար Էդվարդ Նալբանդյանն այսօր լրագրողների հետ հանդիպմանը ամփոփեց նախորդ տարին՝ ընդգծելով տարվա ընթացքում Հայաստանի արտաքին քաղաքականության ամենանշանակալի ձեռքբերումները:
«Հայաստանի արտաքին գործերի նախարարությունը՝ ՀՀ արտաքին քաղաքական ուղենիշերի համաձայն, շարունակել է աշխատանքներ տանել՝ ուղղված երկրի անվտանգության ամրապնդմանը, տարբեր մայրցամաքներում Հայաստանի բարեկամների թիվի ավելացմանը, բարեկամ և գործընկեր պետությունների հետ համագործակցության զարգացմանը, արտերկրում ՀՀ քաղաքացիների շահերի պաշտպանությանը»,-ասաց Նալբանդյանը:
Նա ընդգծեց, որ նախորդ տարվա ամենակարևոր իրադարձությունը Հայաստանի անդամագրումն էր Եվրասիական տնտեսական միությանը: Ըստ նրա՝ դա բխում է ՀՀ ռազմավարական շահերից. «Հայաստանը շարունակել է ԵԱՀԿ Մինսկի համանախագահների հետ համատեղ ջանքեր գործադրել՝ ուղղված հակամարտության խաղաղ կարգավորմանը: Ադրբեջանի կողմից ռազմատենչ հռետորաբանությունը, անընդմեջ կրկնվող դիվերսիոն գործողությունները նոր թափ ստացան, որոնք Բաքվի ապակառուցողական գործընթացների, միջնորդների առաջարկների շարունակական մերժման արդյունքում են տեղի ունենում:
Հայկական ուղղաթիռի խոցումը, անկման վայրը շուրջ տասն օր շարունակ կրակի տակ պահելը զգալի լարվածություն առաջացրին, ինչը համապատասխան արձագանք ստացավ միջազգային հանրության կողմից»:
Նախարարը հավելեց, որ Հայաստանը շարունակում է համագործակցությունը Եվրամիության հետ, իսկ Միացյալ Նահանգների հետ էլ ավելի է ամրապնդում հարաբերությունները՝ դյուրացնելով մուտքի ռեժիմը:
Լրագրողի հարցին, թե ինչո՞ւ է տպավորություն ստեղծվում, թե ՀՀ պետական մարմինների արձագանքն ուշացած է Գյումրու ողբերգությանը, Նալբանդյանը պատասխանեց. «Ահավոր սարսափելի հանցագործության հենց առաջին օրը ՀՀ նախագահը իրավապահ մարմինների ղեկավարների հետ խորհրդակցություն է անցկացրել, տվել համապատասխան արձագանքներ, նշել, որ ամենասեղմ ժամկետում պետք է բացահայտել մանրամասները, հայտնաբերել մեղավորներին, օրենքի ամենախիստ ուժով պատասխանատվության ենթարկել: ՀՀ նախագահը նշել է այդ ամենի կարևորությունը, մեր իրավապահ մարմինները, իրենց կողմից կատարվող աշխատանքների համաձայն, տեղեկատվություն են տրամադրում, հայկական կողմը պատշաճ համագործացկություն է հաստատել ռուսաստանյան գործընկերների հետ, գիտեք, որ հեռախոսազրույց է եղել ՀՀ և ՌԴ նախագահների միջև, ամենաակտիվ շփումները շարունակվում են»:
Նրա խոսքով՝ լիակատար փոխըմբռնում կա, որ պետք է հետաքննությունը լինի բաց և թափանցիկ, և որ մեղավորները պետք է ամենախիստ ձևով պատասխանատվության ենթարկվեն:
Լուսանկարը` PAN Photo-ի