Այն բանից հետո, երբ ԱՄՆ Ֆերգյուսոն քաղաքում օգոստոսի 9-ին պարեկություն կատարող ոստիկան Դարեն Ուիլսոնը կրակեց անզեն սևամորթ դեռահաս Մայքլ Բրաունին, առնվազն ևս 14 ամերիկացի դեռահասներ են սպանվել իրավապահների կողմից: Այս մասին գրում The Daily Beast պարբերականը՝ հրապարակելով 12-19 տարեկան սպանված երիտասարդների ցուցակը:
Նրանցից ամենաերիտասարդը՝ Քլիվլենդից Թամիր Ռայսը, ընդամենը 12 տարեկան էր: Նրան ոստիկանը ծանր վիրավորել է նոյեմբերի 22-ին՝ Քլիվլենդի այգու մանկական հրապարակում: Տղան ճոճվում էր ճոճանակին՝ ձեռքին խաղալիք ատրճանակ, և ինչ-որ մեկը ոստիկան է կանչել: Վերջինս կրակ է բացել՝ վիրավորելով երեխայի կրծքավանդակը: Հաջորդ օրը հիվանդանոցում նա մահացել է:
Առանձին դեպքերում ոստիկանները կրակել են դեպքի վայրերում, ինչպես, օրինակ, սեպտեմբերի 21-ին, երբ ոստիկանությունը ահազանգ է ստացել, թե Թերեբոն գյուղի լքված տներից մեկում ինչ-որ մեկը թաքնվում է: Արդյունքում ոստիկանները սպանել են 14-ամյա Քեմերոն Թիլմանին: Ոստիկանների պնդմամբ՝ նա զինված է եղել, սակայն զոհի եղբայրը հերքում է դա:
Կալիֆոռնիայի 19-ամյա բնակչուհի Դիանա Շոումենն ինքն է ոստիկանություն կանչել՝ նախապես ասելով, թե զինված է «Ուզի» հրացան-գնդացրով: Ոստիկանների ժամանելուն պես նա տնից դուրս է եկել՝ ձեռքին էլեկտրական շաղափիչ: Նրա վրա տեղում կրակել են: Հետո պարզվել է, որ աղջիկն ունեցել է հոգեկան խանգարում: