Վրաստանի վարչապետ Իրակլի Ղարիբաշվիլին Կեդա ավանում գինու նոր արտադրամասի բացման արարողությանը նշել է, որ վրացական գինու արտահանումը աշխարհի 42 երկրներ անցած երկու տարիների ընթացքում ավելացել է 250%-ով: Այս մասին հաղորդում է TASS գործակալությունը:
«Նմանատիպ հաջող արդյունքները նոր խթան են գյուղացիների և հողագործների, ինչպես նաև գործարարների համար, որպեսզի նրանք ավելացնեն իրենց խաղողի այգիները և ավելի ինտենսիվ զբաղվեն խաղողի արտադրությամբ և գինեգործությամբ»,- հայտարարել է վարչապետը:
Վրաստանի գյուղատնտեսության նախարարության Գինու ազգային գործակալության տվյալներով՝ 2012թ. երկրից ընդհանուր առմամբ արտահանվել է 23.3 մլն շիշ գինի, 2013թ.՝ 44.6 մլն շիշ, իսկ ընթացիկ տարվա 9 ամիսների ընթացքում արդեն արտահանվել է 42.8 մլն շիշ գինի:
Հիշեցնենք, որ ապրիլին Վրաստանը ընտրվել է Գինու առևտրի համաշխարհային խմբի (WWTG) նախագահ և այդ պաշտոնին կմնա մինչև 2015թ. ապրիլը ներառյալ: