Տավուշի մարզի ընդհանուր իրավասության դատարանում Զոյա Զաքինյանի նախագահությամբ ավարտվել է Ռադիկ Գաբրիելյանի գործի դատական քննությունը:
63-ամյա Ռադիկ Գաբրիելյանը մեղավոր է ճանաչվել իր կնոջը դիտավորությամբ սպանելու համար՝ ՀՀ քրեական օրենսգրքի 104 հոդվածի 1-ին մասով:
Ըստ դատական ակտի՝ 2014 թվականի հունիսի 27-ին, ժամը 20-ի սահմաններում Ռադիկն իրենց տանը կնոջ հետ վիճաբանել ու ձեռքերով խեղդամահ է արել նրան:
Առաջադրված մեղադրանքի համաձայն՝ ամուսնական կյանքի ընթացքում կնոջ հետ Ռադիկը գտնվել է անբարյացակամ փոխհարաբերությունների մեջ, իսկ վերջին վեճի ու սպանության առիթ է դարձել կնոջ կողմից… տաք կերակուր չպատրաստելու հանգամանքը…
Ռադիկ Գաբրիելյանը բարձրագույն կրթություն ունի, նախկինում դատված չի եղել, հանցավոր դրսևորումներ չի ունեցել:
Ընտանեկան շարքային թվացող վեճը, սակայն, դարձել է կողք կողքի ապրող մարդկանց վերջին «երկխոսությունը», որը իրական երկխոսություն չի դարձել, յուրաքանչյուրը, երևի, իր մենախոսության մեջ է մնացել, ու կատարվել է անուղղելին…
Ընդհանուր իրավասության դատարանում Ռադիկ Գաբրիելյանն իրեն մեղավոր է ճանաչել ու չի ցանկացել ցուցմունք տալ:
Առաջադրված հարցերին պատասխանելով՝ նա ասել է, թե իր ու կնոջ հարաբերությունների վատացման պատճառը եղել է այն, որ ինքը չի աշխատել: Ընտանիքի սոցիալական վիճակը իրեն «վատ դրության մեջ է դրել»: Կնոջն ինքը սպանել է… առանց գիտակցելու:
Հետո անմիջապես հասկացել է, թե ինչ է արել, զանգել է իր մորաքրոջ տղային, ասել է, որ կնոջը սպանել է:
Ռադիկը զղջացել է կատարածի համար:
Տուժողի իրավահաջորդը՝ Ռադիկի ու սպանված կնոջ որդին, ասել է, թե ինքը չի պատկերացնում, թե ինչի պատճառով է եղել հոր և մոր վիճաբանությունը, որը սպանության է հանգեցրել: Իր ծնողների հարաբերությունները կայուն են եղել: Դեպքի օրն ինքը աշխատանքի է եղել: Մտքով էլ չի անցել, թե նման ողբերգություն կարող է լինել…
Իր հորաքույրերի ու մոր հարաբերությունները եղել են նորմալ, նրանք հաճախ են իրենց տուն եկել: Երբեք չեն խառնվել իրենց ընտանեկան հարցերին, իրենց խոհանոցում կերակուր չեն պատրաստել… Իր մայրն աշխատել է, նաև հասցրել է ընտանեկան գործերն անել:
Թաղամասի բնակիչ Գագիկը հայտնել է, թե դեպքի օրը եղել է Ռադիկի մորաքրոջ տղայի՝ Արթուրի հետ, երբ Ռադիկը զանգել է նրան: Արթուրը հեռախոսով խոսելուց հետո ասել է, թե Ռադիկը սպանել է կնոջը և ուզում է իրեն էլեկտրահարելով ինքնասպան լինել:
Իրենք գնացել են Ռադիկի տուն: Տեսել են, որ Ռադիկը, իրոք, կնոջը սպանել է:
Ինքը չի թողել, որ Ռադիկը ձեռքը դնի էլեկտրական լարերի վրա: Հետո Ռադիկը ցանկացել է դանակով ինքնասպան լինել: Ինքն այդ ընթացքում զանգահարել է ոստիկանություն: Իրենք Ռադիկին հորդորել են ու հետ են պահել՝ ժամանակը ձգելով մինչև ոստիկանների գալը:
Ռադիկի մորաքրոջ տղան հայտնել է, թե Ռադիկը զանգել ու ասել է՝ կնոջս սպանել եմ, ինձ էլ եմ սպանում, արի մեզ տիրություն արա:
Բայց մինչև Արթուրն ու նրա ընկերները կհասնեին Ռադիկի տուն՝ վերջինս իրեն «զսպել է», ինքնասպան չի եղել: «Հանդիսատեսների» վրա հասնելուց հետո ձեռքը էլեկտրական լարերին է գցել, դանակ է վերցրել ու սեփական որովայնի վրա քերծվածքներ է արել՝ ավելին անելու համար ձեռքը չի գնացել, ու «դիմացել է» մինչև ոստիկանների գալը…
Ստացիոնար դատահոգեբուժական փորձաքննության եզրակացությամբ՝ Ռադիկ Գաբրիելյանը հոգեկան հիվանդությամբ չի տառապել, չի տառապում, նա ճանաչվել է մեղսունակ: Նրա մոտ հայտնաբերվել է «Հետտրավմատիկ սթրեսային իրավիճակով պայմանավորված հիստերիկ հակազդում»:
Դատարանը պատիժ նշանակելիս հաշվի է առել, որ Ռադիկ Գաբրիելյանը ունի նաև շագանակագեղձի ու երիկամների հիվանդություններ:
Ընդհանուր իրավասության դատարանը կնոջը խեղդամահ անելու համար մեղավոր է ճանաչել Ռադիկ Գաբրիելյանին ու դատապարտել է 9 տարի ազատազրկման:
