«Սայլը՝ մի քիչ ուշացած, բայց տեղից շարժվում է. ԵԱՀԿ Մինսկի խմբի համանախագահները հանդես եկան հայտարարությամբ: Այն բոլոր քննադատությունները, թե դա իրենց գործը չի, դրանք Հայաստանի ու Ադրբեջանի հարաբերություններն են, իրավիճակից հեռու լինելու արդյունք են՝ մարդիկ տեղյակ չեն, թե այս կառույցի մանդատը որն է, և ինչով է այս կառույցը զբաղվում ընդհանրապես»,- ասաց «Ժառանգություն» կուսակցության մամուլի խոսնակ, ԵԱՀԿ հայաստանյան գրասենյակի մոտ հացադուլ սկսած Դավիթ Սանասարյանը:
Իր ուղերձի մասին խոսելով՝ նա նշեց, որ ցանկանում է ԵԱՀԿ Մինսկի խմբի համանախագահներին հասկացնել, որ Ադրբեջանն իրենց ու բոլորի ատամները հաշվել է. «Ադրբեջանը տեղից չի շարժվելու, այդ երկրի հանդեպ պետք է անցնել ճնշումների, պատժամիջոցների սպառնալիքների: Եվ ոչ միայն Մինսկի խմբի համանախագահները, այլև միջազգային հանրությունն ընդհանրապես պետք է արձագանքի սրան»:
«Սա սովորական դեպք չէ, սա համամարդկային վերաբերմունք է: Սակայն այս պարագայում ես Ռուսաստանին չեմ դիմում, քանի որ Ռուսաստանը երբեք չի փայլել մարդու իրավունքների պաշտպանությամբ, մարդու իրավունքների մասին ելույթներ երբևէ չի ունեցել, իսկ ԱՄՆ-ն ու Ֆրանսիան, մեկը՝ օվկիանոսից այս կողմ, մյուսը՝ այն կողմ, տարբեր առիթներով մշտապես խոսել են մարդու իրավունքներից»,- հավելեց Սանասարյանը:
Սանասարյանի խոսքով՝ սա առաջին հերթին պետք է հենց այդ երկրներին, ոչ միայն մեզ:
Դավիթ Սանասարյանը տեղեկացրեց, որ հացադուլը շարունակելու է, քանի դեռ տղաների վիճակն անօգնական է: