Ադրբեջանն ուսումնասիրում է, թե ինչ երթուղիներով ադրբեջանական գազը մատակարարի Հունգարիա՝ հայտնել է երկրի նախագահ Իլհամ Ալիևը Հունգարական ազգային հեռուստատեսության հետ հարցազրույցում:
«Մենք Հունգարիային գործընկեր ենք համարում էներգետիկ համագործակցության ոլորտում և ուսումնասիրում, թե ինչ ուղիներով մատակարարել ադրբեջանական գազը Հունգարիա: Դա կարող է լինել Բուլղարիա-Ռումինիա-Հունգարիա երթուղին կամ Հոնիա-Ադրիատիկ խողովակաշարը, որն անցնում է Բալկանյան երկրներով, այնուհետև Խորվաթիայից անցնում Հունգարիա: Պետք է քննել հարցն այն մասին, թե որ երթուղին է ընդունելի մեզ բոլորիս համար: Հաշվի առնելով Հարավային գազային միջանցքի նախագիծը, որը մենք իրականացնում ենք, և Ադրբեջանի գազային պաշարները, կասկած չունեմ, որ Հունգարիան և Ադրբեջանը կդառնան գործընկերներ գազային ոլորտում»,-ասել է Ալիևը՝ փոխանցում է TASS գործակալությունը:
«Մեր գազի հաստատված նվազագույն պաշարները գտնվում են 2.5 տրիլիոն խորանարդ մետրի մակարդակում և ավելին կլինեն, քանի որ մենք դեռևս հետախուզական աշխատանքներ են իրականացնում: Նույնիսկ այդ թիիվը բավարար է՝ եվրոպացի սպառողների համար հուսալի գազային աղբյուր դառնալու առնվազն 100 տարվա ընթացքում»,- ասել է Ալիևը:
Երեկ Հունգարիայի վարչապետ Վիկտոր Օրբանն ու Ալիևը Բուդապեշտում հռչակագիր էին ստորագրել ռազմավարական գործընկերության մասին, որը նախատեսում է գազի մատակարարումների կազմակերպում դեպի կենտրոնական Եվրոպա: