2015-ի հուլիսի 1-ից Հայաստանում նվազագույն աշխատավարձի չափը կսահմանվի 55 հազար դրամ՝ 2014-ի 50 հազարի փոխարեն: Այս մասին այսօր՝ ԱԺ-ում 2015 թվականի պետական բյուջեի նախագծի քննարկման ժամանակ, հայտարարեց ֆինանսների փոխնախարար Պավել Սաֆարյանը:
Նրա խոսքով՝ սա նշանակում է, որ Հայաստանում 55 հազար դրամից ցածր որևէ աշխատավարձ չի վճարվելու, և սա վերաբերում է այն կատեգորիայի աշխատողներին, որոնք ստանում են նվազագույն աշխատավարձ:
«Հաճախ նվազագույն աշխատավարձի բարձրացումը դարձնում են քննարկման առարկա, թե տեսեք՝ հինգ հազար դրամով է ավելանում աշխատավարձը: Քաղաքացիական աշխատողների ամսական միջին աշխատավարձը 293.000 դրամի դիմաց 2015-ի հուլիսի մեկից կդառնա 300.000 դրամ: Ընտանեկան նպաստների համար 2014-ին հատկացվել է 37.1 միլիարդ դրամ, իսկ հաջորդ տարի կհատկացվի 38.381 մլրդ դրամ գումար:
Ընտանեկան նպաստի միջին ցուցանիշը ամսական 29.537 դրամի փոխարեն 2015-ի բյուջեով նախատեսված է 30.537 դրամ»,- ասաց փոխնախարարը:
ԲՀԿ-ական պատգամավոր Միքայել Մելքումյանը հետաքրքրվեց, թե քանի հոգի են Հայաստանում ստանում նվազագույն աշխատավարձ, ինչին ի պատասխան՝ Պավել Սաֆարյանը խոստացավ տվյալներ հաղորդել ավելի ուշ, քանի որ այս պահին ձեռքի տակ չկան այդ տվյալները:
Նա նաև նշեց, որ երեխայի ծննդի հետ կապված լրացուցիչ 50 հազար դրամը կպահպանվի, մինչև երկու տարեկան երեխաների նպաստի չափը՝ 18 հազար դրամը, ևս պահպանվել է և մյուս տարի փոփոխության չի ենթարկվելու:
Լուսանկարը՝ Armenpress-ի