Հակափխենյանական հասարակական խմբավորումների ակտիվիստները Հյուսիսային Կորեայի ուղղությամբ օդային փուչիկներ են արձակել, որոնց վրա այդ երկրում կոռուպցիան և մարդու իրավունքների լուրջ խախտումները քննադատող թռուցիկներ են եղել: Այս մասին հաղորդում է TASS-ը:
Փխենյանը պահանջում է դադարեցնել քարոզչական թռուցիկների թողարկումը` դրանք հավասարեցնելով «պատերազմ հայտարարելուն» և սպառնալով գնդակոծել դրանց թողարկման սահմանամերձ վայրերը:
Այս շաբաթ, սակայն, Հարավային Կորեայի կառավարությունը հայտարարել է, որ ըստ սահմանադրության՝ ինքն իրավունք չունի հասարակական կազմակերպություններին արգելել փուչիկների արձակումը:
Իր կողմից, Փխենյանը սպառնացել է չեղյալ հայտարարել հոկտեմբերի սկզբին Սեուլի հետ ձեռք բերված պայմանավորվածությունները` հոկտեմբեր-նոյեմբերին բարձր մակարդակով միջկորեական բանակցություններ անցկացնելու վերաբերյալ, եթե թռուցիկներ արձակելու քարոզարշավը չդադարեցվի:
Շաբաթ օրը Իմջինգակի շրջանում փուչիկներ արձակելու փորձը տեղի բնակիչների դիմադրությանն է հանդիպել: Դրանից հետո ակտիվիստներն այլ վայր են տեղափոխվել` Հարավային և Հյուսիսային Կորեաների արևմտյան սահմանի մոտ, և արձակել 20 փուչիկներ` թռուցիկներով:
