Հաջորդ սերնդի Audi A8 լյուքսային լիմուզինը ավտոմատ կառավարման համակարգ կստանա, հաղորդում է ավստրալիական Motoring պարբերականը՝ հղում անելով ընկերության թոփ-մենեջեր Ստեֆան Մոզերը:
Սա գերմանական ընկերության նման առաջին մեքենան է: Մոզերի խոսքերով՝ այն վարորդից ավելի լավ կերթևեկի: «Ավտոմեքենաները հեռախոսով չեն զանգում, գեղեցիկ աղջիկներին չեն նայում, չեն շեղվում»,- կատակել է նա: Մենեջերը նշել է, որ Audi-ն ցանկանում է աշխարհում առաջին ընկերությունը դառնալ, որն ամբողջովին ավտոմացված մեքենա կթողարկի: Նրա խոսքերով՝ տեխնոլոգիան արդեն փորձարկվել է և լավ արդյունքներ ունի, այժմ հարկավոր է իրավաբանական ձևակերպումներ անել:
Մոզերի խոսքերով՝ ավտոմեքենան տեսախցիկների, ռադարների, լազերների և տեխնիկական այլ սարքավորումների շնորհիվ կարող է աշխատել ցանկացած պայմաններում: «Օրինակ՝ լազերի շնորհիվ կարող եք տեսնել մառախուղի մեջ»,- բացատրել է նա:
Նրա խոսքերով՝ մեքենայի դիզայնի մասին գաղափար կարելի է կազմել ընթացիկ տարվա նոյեմբերին Լոս Անջելեսում կայանալիք մոտոր-շոուին, որտեղ կներկայացվի Audi A9-ի կոնցեպտը: Audi A8-ի վերջնական տարբերակը կցուցադրեն 2016 թ.՝ սերիական թողարկումից հետո: