«Հայկական ժամանակ» թերթը գրում է. «Վերջին շրջանում ակնհայտորեն նվազել է Հայաստանի՝ Եվրասիական տեսական միությանն անդամակցելու փայլուն հեռանկարների մասին իշխանավորների կողմից հյուսվող դիֆերամբների հաճախականությունը:
Անդամակցությանը մնացել են հաշված օրեր, և պետք է որ տեղի ունենար հակառակը:
Դրա պատճառը, թերևս այն է, որ էականորեն փոխվել են ԵՏՄ-ին անդամակցելու հետևանքների գնահատականները:
Նախ ապրանքացանկը, որի շուրջ ՀՀ կառավարությունը բանակցում էր ԵՏՄ անդամ երկրների հետ արտոնյալ մաքսատուրքերի համաձայնություն ստանալու նպատակով, անցած ամիսների ընթացքում փոխվել է:
Այդ ցանկից հանվել են լայն սպառման ապրանքատեսակները, որոնց նկատմամբ անդամակցության արդեն ստորագրված պայմանագրի համաձայն որևէ արտոնություն չի սահմանվում, դրանց նկատմամբ հենց հունվարի մեկից գործելու են շատ ավելի բարձր մաքսատուրքեր, քան ներկայումս: Խոսքը, մասնավորապես, տավարի մսի, հավի մսի, որոշ կաթնամթերքների մասին է, որոնք այլևս չկան բաղձալի այդ ցուցակում:
Էկոնոմիկայի նախարարությունում նույնիսկ կասկածներ են առաջացել, որ նախկինում կատարված հաշվարկները ճիշտ չեն:
Ո՞րն է այդ կասկածների հիմքը: Օրինակ՝ անցած ողջ տարվա ընթացքում Հայաստան է ներկրվել 4.4 մլրդ դոլարի ապրանք: Դրանից միայն մեկ միլիարդ դոլարի ապրանքն է ներկրվել ԵՏՄ անդամ երկրներից: Եթե ներկրումների աշխարհագրությունը մնա անփոփոխ, ապա կստացվի, որ ոչ ԵՏՄ երկրներից մենք ներկրում ենք 3.4 մլրդ դոլարի ապրանք:
Դրանից ևս մոտ 900 մլն դոլարի ապրանքներ առաջիկա մի քանի տարիներին կշարունակվեն ներկրվել գործող մաքսատուրքերով: Իսկ դա նշանակում է, որ ոչ ԵՏՄ անդամ երկրներից մենք կներկրենք 2.5 մլրդ դոլարի ապրանքներ, որոնց վրա մաքսատուրքերն աճելու են 5-25 տոկոսով և նույնիսկ ավելի:
Մանրամասները՝ թերթի այսօրվա համարում