«Այս ամենը խոսում է Գագիկ Ծառուկյանի քաղաքական տհասության և անպատժելիությունից ու փողի շատությունից առաջացած ցինիզմի մասին»,- «Առաջին լրատվական»-ի հետ զրույցում ասաց Սյունիքի մարզպետի խորհրդական Վոլոդյա Հովհաննիսյանը՝ գնահատելով Գագիկ Ծառուկյանի դիմակավորված անձանց կողմից իր հանդեպ հնչեցված սպառնալիքները:
Հիշեցնենք, որ ամեն ինչ սկսվել էր այն բանից հետո, երբ գնդապետ Հովհաննիսյանը արձագանքել էր Սերժ Սարգսյանին և Սուրիկ Խաչատրյանին (Լիսկա) ծաղրող Zham.am կայքի «Քաղաքական տիկնիկներ» ՝նյութին իր հերթին, իր հոդվածում որոշ մանրամասներ վերհիշելով Գագիկ Ծառուկյանի անցյալից:
Չհանդուրժելով այդ քննադատությունը՝ մի քանի դիմակավորված անձինք նստել էին Հովհաննիսյանի մեքենան և, առանց անունենր նշելու, հորդորել այլևս այդպիսի հոդվածներ չգրել, հակառակ դեպքում, եթե իրենց հրամայեն, ապա իրենք ամեն ինչի ընդունակ են:
«Չի կարելի քննադատությունն ընդունել այդքան թշնամաբար և փորձել պատժել մարդկանց, ովքեր հարյուրապատիկ, հազարապատիկ ավելին են արել այս երկրի համար, քան ինքը: Նա իրեն շրջապատել է իրեն թագավոր անվանող սինլքորներով և սողուններով, որոնք այնքան են կեղծ գովեստներ շռայլել Ծառուկյանին, որ վերջինս արդեն ընդունում է, հավատացել է, որ իրականում ինքն այդպիսին է: Նա, կարող է, որպես հայր, ամուսին՝ լավ մարդ է, բայց որպես քաղաքական գործիչ՝ նա չկա: Ես այդ մարդկանց ասացի, որ եթե հանկարծ Ծառուկյան Գագիկը համարձակվի մտածել, որ կարող է Արցախյան ազատամարտով անցած գնդապետին վախեցնել, ապա ես արյան բաղանիք կսարքեմ իր համար: Ես այդպես եմ պատասխանել նրանց»,- նկատեց Հովհաննիսյանը:
Նշենք, որ այն կայքյերը, որոնք հրապարակել էին Վոլոդյա Հովհաննիսյանի հոդվածը, ենթարկվել էին հաքերային հարձակման, իսկ որոշներն էլ, տեսնելով կատարվածը, իրենք էին ինքնակամ հեռացրել նյութը:
Հովհաննիսյանի բնորոշմամբ՝ լրատվական կայքերի նկատմամբ իրականացված այդ հարձակումը, ասել է թե՝ խոսքի ազատության դեմ ոտնձգությունը, ավելի նողկալի երևույթ է, քան, իր բնորոշմամբ, գնդապետին սպառնալը: «Այսքանից հետո Ծառուկյանը չի կարող ընդդիմադիր դաշտում խաղալու փորձեր անգամ անել: Մարդը, որը պատրաստ չէ քննադատություն հանդուրժել, քաղաքական վիճաբանության մեջ մտնել մարդկանց հետ, ովքեր տարբեր տեսակետներ ունեն, ինչպե՞ս կարող է ընդդիմադիր կեցվածք ընդունել, առավել ևս՝ հանդես գալ երկիրը ղեկավարելու, նախագահ դառնալու ապագայի նկրտումներով: Նա իր պահվածքով, իր պետրոսներով իրեն արդեն խայտառակել է: Ինչպե՞ս կարող է մարդկային արժանապատվությունը, անձի ազատությունները ոտնահարող մարդը դառնալ այս երկրի Սահմանադրության երաշխավորը:
Նա ձգտում է մի բանի, որն իր համար դեռևս անհասանելի է և իր մակարդակի համար չէ: Եվ դա ծիծաղելի է»,- ասաց Հովհաննիսյանը:
Հովհաննիսյանը նշեց, որ ինքը ոչ մի տեղ բողոք չի ներկայացրել և ոչ էլ պաշտպանության կարիք ունի: «Եթե, Աստված ոչ արած, իմ դեմ բռնարարքներ լինեն, ապա ես կկարողանամ արժանի հակահարված տալ: Եվ հետո՝ եթե մի մարդու կողքին Ծաղիկ Ռուբոյի նման ոչնչություններն են, ապա նա ոչ ոքի չի կարող սպառնալ»,- եզրափակեց գնդապետ Հովհաննիսյանը:
