«Հրապարակ» թերթը գրում է. «Երևանյան 3 կայքեր՝ «Նոր լուր», «Վարկած» և «Ելք», հոկտեմբերի 15-ին տեղադրել էին Սյունիքի մարզպետի խորհրդական Վոլոդյա Հովհաննիսյանի բաց նամակը, մեկ օրում կիբորգ-հարձակման ենթարկվեցին: «Վարկածի» խմբագիր Ռուզան Ավոյանի խոսքով, դա տեղի ունեցավ այն բանից հետո, երբ կայքը տեղադրեց Սյունիքի մարզպետի խորհրդական Վոլոդյա Հովհաննիսյանի «Արդեն խոսում են Գագիկ Ծառուկյանի տիկնիկները» հոդվածը: Հեղինակը՝ արցախյան ազատամարտի մասնակից, գնդապետ Հովհաննիսյանը, արձագանքել էր Սերժ Սարգսյանին և Լիսկային ծաղրող Zham.am կայքի «Քաղաքական տիկնիկներ» հաղորդաշարին և որոշ տեղեկություններ էր վերհիշել Գագիկ Ծառուկյանի անցյալից: Սակայն ԲՀԿ-ն իր առաջնորդի հասցեին քննադատություն չի հանդուրժում՝ Լիսկայի խորհրդականի խոսքը չպետք է հասներ ընթերցողին: Եվս երկու ԶԼՄ-ներ, հավանաբար տեղեկանալով այս հեռանկարի մասին, ինքնակամ էին հանել նյութը: Բայց սա դեռ սկիզբն էր գնդապետի դեմ պայքարի, որը գնալով քրեական բնույթ ստացավ:
Երեկ Վոլոդյա Հովհաննիսյանը մեզ հայտնեց, որ հոկտեմբերի 16-ին դիմակավոր 3 մարդ Երևանի Արցախի փողոցում կանգնեցրել են իր մեքենան և սպառնացել նրա հետ հաշվեհարդար տեսնել: «Ինձ վերցրել, տարել են մի տեղ և բացատրել են, որ Գագիկ Ծառուկյանի դեմ ոչինչ չանեմ: Նրանք շքեղ մեքենայով էին՝ «Տոյոտա» մակնիշի, եկան նստեցին, շատ կուլտուրական, կիրթ խնդրում էին՝ ճանաչելով Ձեզ, խնդրում ենք մի արեք, հիմա դեռ խնդրում ենք, իսկ եթե հրաման տրվի, ապա մենք ամեն ինչի ընդունակ ենք»: Վոլոդյա Հովհաննիսյանը չի դիմել ոստիկանություն. «Ո՞ւմ դիմել: Եթե կայքէջերը փակվում են, և ոստիկանությունը ոչինչ չի անում, ո՞նց կարելի է դիմել», սակայն չի վախեցել սպառնալիքներից և հայտարարել է, որ իրեն նման ձևով հնարավոր չէ կոտրել: Իրավապահ մարմինները կարող են սույն հրապարակումն ընդունել որպես հաղորդում հանցագործության մասին:
Վոլոդյա Հովհաննիսյանը նաև պատմեց, որ Սուրեն Խաչատրյանն իր վաղեմի ընկերն է, և ինքը, տեսնելով, որ ԲՀԿ գրասենյակի ղեկավար Կարինե Վարդանյանը «Քաղաքական տիկնիկներ» ինտերնետային հաղորդման մեջ նախագահին և Սուրիկ Խաչատրյանին ծաղրող երկխոսություն է տեղադրել, որոշել է պաշտպանել է Սուրեն Խաչատրյանին: «Ես նրա խորհրդականն եմ, ես նրան պաշտպանում եմ, իմ հայացքը դա է: Ես այդ դիմակավոր երիտասարդներին ասացի, որ մենք էլ կարող ենք պիտակավորել Ձեր առաջնորդին, տալ նրա իսկական անունը, բայց իմ դաստիարակությունը թույլ չի տալիս, և ես ոչ մի տեղ այն չեմ օգտագործել»: Գնդապետն ասում է, որ ընդամենը արտահայտել է իր կարծիքը և «Արդեն խոսում են Ծառուկյանի տիկնիկները» հոդվածի մեջ գրել է, որ Սուրեն Խաչատրյանի ծառայություններն այս երկրին հարյուրապատիկ ավելի են պետք, քան «թագավոր» Գագիկ Ծառուկյանինը:
«Կարինե Վարդանյանը խոսում է բռնաբարությունների և սպանությունների մասին: Խորհուրդ եմ տալիս ուսումնասիրել Ձեր կուսակցության լիդեր Գագոյի ռուսաստանյան անցյալը, որտեղ դուք կստանաք հանրությանը հայտնի փաստերի պատասխանը»,- գրել է Հովհաննիսյանը, ապա հիշեցրել, որ երբ Սուրիկ Խաչատրյանը 500 քաջերի ջոկատ էր ստեղծում, «Գագիկ Ծառուկյանը թաքնվել էր անհայտության մեջ» և եթե անգամ կրել է զինվորական համազգեստ, ոչ թե հայրենիքի պաշտպանության համար, «այլ անարգել բալոններով գազ վաճառելու»: Գնդապետը հիշատակել է, որ «Երևան-Սևան մայրուղու վրա գազ վաճառող ենթասպան դիմացի բլուրների վրա կառուցեց երկու դղյակատիպ հսկաներ, որոնք ուժգին ապտակներ էին ծանր տնտեսական վիճակում գտնվող հայ հասարակությանը»:
Մանրամասները՝ թերթի այսօրվա համարում
