«Հրապարակ» թերթը գրում է. «Քննարկման մասնակիցների համար անակնկալ կերպով «Ժառանգություն» խմբակցության ղեկավար Ռուբեն Հակոբյանը հրապարակեց մի քանի նախապայմաններ, որոնց կատարման դեպքում «Ժառանգությունը» կարող է մասնակցել սահմանադրական բարեփոխումների գործընթացին: Դրանցից մեկը «Ժառանգության» կողմից առաջիկայում ԱԺ ներկայացվելիք «Ընդդիմության մասին» օրենքի ընդունումն է, որով նախատեսվելու է ընդդիմությանը տալ վերահսկողական լծակներ: Իշխանությունը թերևս պատրաստ է կատարել այս նախապայմանը: Սահմանադրական բարեփոխումների նախագահական հանձնաժողովի անդամ, սահմանադրագետ Վարդան Պողոսյանը քննարկման ժամանակ հայտարարեց, որ սահմանադրական բարեփոխումների հանձնաժողովի կողմից քննարկվում են այն դրույթները, որոնցով մի շարք պաշտոնյաների ընտրության համար կպահանջվի որակյալ քվորումի առկայություն: Մասնավորապես՝ նախատեսվում է, որ Վերահսկիչ պալատի նախագահը և Կենտրոնական ընտրական հանձնաժողովի նախագահն ընտրվեն ոչ թե ձայների պարզ մեծամասնությամբ, այլ՝ 3/5-ով: Նման նորամուծության նպատակն այն է, որ խորհրդարանական ընդդիմությունն ավելի մեծ ազդեցություն ունենա այս պաշտոնյաների ընտրության հարցում, ինչպես նաև ներկայացվածություն այդ կառույցներում: Հաջորդ նախապայմանն էլ այն է, որ Սահմանադրության հանրաքվեից հետո անցկացվեն համապետական արտահերթ ընտրություններ, որը, ըստ Ռ. Հակոբյանի, կարող է անցկացվել 2016 թվականին՝ ակնարկելով, որ գոնե մի «սռոկ» էլ երկարաձգեն իրենց քաղաքական ապագան, որից հետո ինչ ուզում են՝ անեն: Փոխարենը ՀԱԿ-ից Լևոն Զուրաբյանը տքնաջան աշխատանք էր կատարել և համաշխարհային պրակտիկայում սահմանադրության փոփոխության պատեհության մասին ծավալուն ծաղկաքաղով փորձում էր համոզել, որ ոչ մի ժողովրդավարական պետություն մեկ անգամ կառավարման համակարգը հաստատելուց հետո այն չի փոխում, եթե պետական ինստիտուտների ինչ-որ մի փլուզում չի կատարվել, ոնց որ եղավ, ասենք, Ֆրանսիայում՝ 1959-ին: Գործընկերներին, սակայն, ձանձրալի թվացին Զուրաբյանի երկարաշունչ հիմնավորումները, և Գալուստ Գրիգորիչի գործն ստանձնած Ռուբիկ Հակոբյանի միջոցով Զուրաբյանին ամբիոնից մի քանի անգամ հետկանչի փորձերն ի վերջո հաջողվեցին: Բայց նա արդեն հասցրել էր հայտարարել, որ «այդ փոփոխություններն արվում են մեկ բանի համար, որ Ս. Սարգսյանը հավերժ իշխի Հայաստանում, մենք այդպիսի բան երբեք թույլ չենք տա»:
ԱԺ «Բարգավաճ Հայաստան» խմբակցության պատգամավոր Էլինար Վարդանյանն էլ «քավոր» կանգնեց իրենց հավատարիմ դաշնակցի խոսքին՝ ասելով, որ Հայաստանում առկա խնդիրները պայմանավորված չեն Սահմանադրությամբ, որ այսօր մեր ժողովրդին հուզող խնդիրները տնտեսական են, և պետք չէ մտնել Սահմանադրությունը փոխելու խնդրահարույց վեճերի մեջ: Նա ասաց, որ եթե սահմանադրական բարեփոխումների փաթեթը դրվի շրջանառության մեջ, ապա իրենք կհավաքեն ժողովրդին՝ հասկանալու, թե պե՞տք են մեզ այդ փոփոխությունները:
Մանրամասները՝ թերթի այսօրվա համարում