Վերաքննիչ քրեական դատարանում ավարտվեց Ռուզաննա Ս.-ի գործով բերված վերաքննիչ բողոքի քննությունը:
Գործը քննվել է Շենգավիթ վարչական շրջանի ընդհանուր իրավասության դատարանում Նելլի Բաղդասարյանի նախագահությամբ:
Ըստ մեղադրանքի՝ Ռուզաննան 2013 թվականի նոյեմբերի 10-ին «Օդնոկլասնիկի» համացանցային կայքում ամուսնու նախկին սիրուհու՝ Գայանեի անունով բացել է կայքէջ, որտեղ առանց իր ախոյանուհու համաձայնությունը ստանալու տեղադրել է նրա մերկ լուսանկարը, այսինքն տարածել է տուժողի վերաբերյալ անձնական գաղտնիք պարունակող տեղեկություն:
Ռուզաննան մեղավոր է ճանաչվել ՀՀ քրեական օրենսգրքի 144 հոդվածով:
Ռուզաննայի խնամքին են երեք անչափահաս երեխաները՝ 15, 12 և 3 ու կես տարեկան:
Նախաքննության ընթացքում մեղքն ընդունած Ռուզաննան ընդհանուր իրավասության դատարանում դատաքննության ժամանակ հայտարարել է, թե ամուսնու նախկին սիրուհու մերկ լուսանկարը նրա անունով բացված կայքէջում տեղադրել է ոչ թե ինքը, այլ տասնչորսամյա որդին:
Պատանին դատարանում հաստատել է մոր ասածը, թե հոր սիրուհու մերկ լուսանկարն ինքն է տեղադրել համացանցում՝ լուսանկարը վերցնելով հոր հեռախոսի չիպից:
Ընդհանուր իրավասության դատարանը անհամոզիչ է համարել պաշտպանական կողմի վարկածը:
Դատարանը մեղավոր է ճանաչել Ռուզաննային և դատապարտել 250 հազար դրամ տուգանքի:
Դատարանն առանց քննության է թողել տուժողի ներկայացրած քաղհայցը՝ պատճառված վնասի հատուցման վերաբերյալ՝ 1 միլիոն 100 հազար դրամի չափով:
Դատավճռի դեմ վերաքննիչ բողոք էր բերել ամբաստանյալ Ռուզաննայի շահերի պաշտպան Կարեն Մանուչարյանը:
Վերաքննիչ քրեական դատարանում նա հիմնավորեց բողոքը՝ պնդելով, թե հոր սիրուհու մերկ լուսանկարը համացանցում տարածել է տասնչորսամյա տղան՝ տուժողի անբարո վարքագծից վրդովված լինելով:
«Տուժողի սանձարձակ վարքագիծը խիստ բացասական է ազդել երեխայի հոգեվիճակի վրա… նա երկար ժամանակ սթրես է տարել»,- ասաց պաշտպանը՝ հենց սթրեսային հոգեվիճակով էլ բացատրելով տղայի արարքը:
Ըստ պաշտպանի՝ ընդհանուր իրավասության դատարանը կայացրել է անարդար ու անհիմն դատական ակտ, գործով բավարար ապացույցներ ձեռք չեն բերվել Ռուզաննայի նկատմամբ մեղադրական դատական ակտ կայացնելու համար:
Պաշտպանը միջնորդեց բեկանել ընդհանուր իրավասության դատարանի դատավճիռը, Ռուզաննային արդարացնել, նրա նկատմամբ դադարեցնել քրեական հետապնդումը:
Ամբաստանյալ Ռուզաննան ասաց, թե ինքը չի տեղադրել ամուսնու սիրուհու մերկ լուսանկարը, բայց քննիչի մոտ մեղքն իր վրա է վերցրել, որ երեխան քաշքշուկի մեջ չընկնի:
Նախագահողը հարցրեց, թե ինչո՞ւ է Ռուզաննան փոխել դիրքորոշումը, հիմա ցանկանո՞ւմ է, որ տղան «ընկնի քաշքշուկի մեջ»:
Նախագահողը հարցրեց նաև՝ եթե Ռուզաննայի որդին է համացանց գցել մերկ կնոջ լուսանկարը, ինչո՞ւ է Ռուզաննայի ամուսինը քննիչին դիմում գրել. «Իմ կինը դա արել է խանդից ելնելով, խնդրում եմ ներեք…»:
Ռուզաննան ասաց, թե ամուսինն էլ չի ցանկացել, որ որդին ընկնի քաշքշուկի մեջ:
Մեղադրողն առարկեց բերված բողոքի դեմ: Նա նշեց, որ նախաքննության ամբողջ ընթացքում խոսք չի եղել հանցավոր արարքը անչափահաս տղայի կողմից կատարված լինելու մասին:
«Անչափահասը՝ տասնչորս տարեկան տղան, տվյալ հանցակազմի սուբյեկտ չէ, պաշտպանական կողմը ցանկանում է պատասխանատվությունը գցել երեխայի վրա: Մայրը կազատվի, երեխան էլ պատասխան չի տա»,- ասաց դատախազ Տ. Հակոբյանը:
Ռուզաննայի շահերի պաշտպան Կարեն Մանուչարյանը կասկածելի համարեց նախագահողի հնչեցրած հարցերը, նա ենթադրեց, թե նախագահող դատավորը լավ չի ծանոթացել քրեական գործի նյութերին, բացի դրանից՝անաչառ չէ:
Պաշտպանն ինքնաբացարկի միջնորդություն ներկայացրեց նախագահող դատավորի դեմ:
Դատավոր Պետրոսյանը մերժեց պաշտպանի միջնորդությունը:
Այնուհետև դատարանը հեռացավ խորհրդակցական սենյակ: Քիչ անց հրապարակվեց որոշումը:
Դատարանը մերժեց պաշտպանի վերաքննիչ բողոքը և անփոփոխ թողեց ընդհանուր իրավասության դատարանի դատավճիռը՝ այն գնահատելով որպես օրինական ու հիմնավոր:
Կցանկանա՞ Ռուզաննան վճռաբեկ ատյանին ևս հասու դարձնել իր ընտանեկան հարկի ներքո տիրող մթնոլորտին և անչափահաս որդուն որպես հանցավոր արարքի կատարող ներկայացնել՝ դեռ հայտնի չէ: Ինչպես և հայտնի չէ՝ բողոքը, եթե այն լինի, դատական վերին ատյանն իր վարույթ կընդունի՞:
Առայժմ ավելի իրական է դատական երկու ատյանների կողմից Ռուզաննայի արարքի համաչափ պատիժ համարված 250 հազար դրամ տուգանքը:
