«Առաջին լրատվականի» զրուցակիցն է «Խոսքի ազատության պաշտպանության կոմիտեի» նախագահ Աշոտ Մելիքյանը։
-Ռոբերտ Քոչարյանի ժամանակահատվածում լրատվամիջոցները ինչպիսի՞ իրավիճակում էին, մամուլի ազատության մասով ի՞նչ պատկեր էր՝ հաշվի առնելով նաև այն, որ Ռոբերտ Քոչարյանին գովերգող վերջին ֆիլմում մի քանի լրատվամիջոցների ներկայացուցիչներ ևս խոսում էին:
-Ռոբերտ Քոչարյանի ժամանակահատվածում լրատվամիջոցները ամենավատ վիճակում են գտնվել. ավելի շատ ֆիզիկական բռնության դեպքեր, ճնշումների դեպքեր՝ քան այն ժամանակ՝ չեն եղել։ Դա ես ամենայն պատասխանատվությամբ կարող եմ ասել: Մենք 2008-2009 թթ. տվյալները համեմատում ենք, տեսնում ենք՝ լուրջ տարբերություն կա: Իհարկե, դա չի նշանակում, որ խնդիրները հաղթահարված են. ինչպես տեսնում ենք, թե ֆիզիկական ճնշման դեպքեր կան, թե ինֆորմացիա ստանալու, թե տարածելու իրավունքի խախտման դեպքեր, ուղղակի քանակապես այն ժամանակ շատ ավելի շատ էր, քան հիմա:
-Կոնկրետ ինչպիսի՞ քայլեր էին իրականացվում, ճնշման ի՞նչ լծակներ էին օգտագործվում:
-Սկսենք նրանից, որ Ռ. Քոչարյանի թեթև ձեռքով «Ա1+»-ը փակվեց: Դա քաղաքական պատվեր էր, որ Հեռուստատեսության և ռադիոյի ազգային հանձնաժողովը կատարեց: Հենց դրանից սկսվեց այն գործընթացը, երբ միջազգային կազմակերպությունները դասում էին Հայաստանյան լրատվամիջոցները ոչ ազատների շարքին և մինչև հիմա այդպես է:
Հիշենք՝ 2004 թ. Բաղրամյանի պողոտայի վրա, երբ ընտրություններից հետո սկսվեցին ընդվզումներ, ինչպիսի դաժան ծեծի ենթարկվեց ОРТ-ի սեփական ներկայացուցիչը, բազմաթիվ այլ, այդ թվում՝ հայաստանյան լրատվամիջոցների ներկայացուցիչներ:
Հիշենք թե ինչ էր կատարվում 2008 թ. մարտի 1-ից հետո՝ մի շարք լրատվամիջոցներ Ռոբերտ Քոչարյանի հրամանագրով փակվեցին: Հենց ցենզուրայի, վերահսկողության պատճառով նրանք նպատակահարմար չհամարեցին իրենց գործունեությունը շարունակել և միայն արտակարգ իրավիճակը հանելուց հետո վերսկսեցին: Այնպես որ, ես համարում եմ, որ Ռոբերտ Քոչարյանը՝ որպես քաղաքական գործիչ, ԶԼՄ-ների համար 1 թշնամին է: Եվ առհասարակ, վերջին ֆիլմը նրա մասին ուղղակի ծիծաղելի է: Համենայն դեպս, մարդիկ, ովքեր ապրել են այդ ժամանակահատվածում և ակտիվ հասարակական գործունեությամբ են զբաղվել, շատ լավ գիտեն , թե ինչ է արել Ռոբերտ Քոչարյանը՝ և դրականը, բայց նաև բազմաթիվ բացասկան կողմերը, որոնց մասին առհասարակ այդ ֆիլմում ոչինչ չկար:
Հարցազրույցն՝ ամբողջությամբ տեսանյութում։