ԿՀՎ-ի տրամադրության տակ կան բոլոր տեխնոլոգիական, կադրային և ֆինանսական միջոցները, սակայն, աշխարհը նախկինի պես շատ քիչ է տեղեկացված Ուկրաինայի արևելքի և Իրաքի իրադրությունների մասին, գրում է Կառոլինե Ֆետչերը գերմանական Tagesspiegel պարբերականում:
Առաջին հերթին լրագրողին հետաքրքրում են ուկրաինական հակամարտության «ոչ պետական սուբյեկտները»: «Ինչո՞ւ է ամբողջ աշխարհը գուշակում, ով, երբ և որտեղ է «անցնում» ռուս-ուկրաինական սահմանը»,- հարցնում է Ֆետչերը:
Նրա կարծիքով՝ «խելացի» հետախուզությունն արդեն վաղուց պետք է հրապարակած լիներ արբանյակային լուսանկարները, բանակցությունների ոչ երկիմաստ ձայնագրությունները և կբացատրեր բոլոր հարցերը, այդ թվում նաև, թե ով է խփել մալազիական Boeing-ը: Նման «անտեղյակությունը», նշում է լրագրողը, լավ տպավորություն չի թողնում հատուկ ծառայությունների հնարավորությունների վերաբերյալ:
Ֆետչերը օրինակ է բերում «Իսլամական պետության» Twitter-ի օգտահաշվում հրապարակված լրագրող Ջեյմս Ֆոուլիի մահապատժի տեսագրությունը: Այդ օգտահաշիվը տասնյակ հազարավոր բաժանորդներ ուներ. մի՞թե հնարավոր չէ բացահայտել նրանց: Եվ ինչպե՞ս է տեղի ունենում, որ «Իսլամական պետությունը» գաղտնի զինվում է և ոչ փոքր գումարներով, և ինչո՞ւ դա ամենասկզբում չի կասեցվել:
Լրագրողը ԿՀՎ-ից, որպես աշխարհի առաջատար հետախուզություն, բացատրություններ է պահանջում և իր պահանջները մեծ չի համարում: Ֆետչերի կարծիքով՝ հանուն իր վարկանիշի ամերիկյան հատուկ ծառայությունը պետք է ցուցադրի իր կարողություններն ու հնարավորությունները: